Shillong, Risaw 03: U MLA ka South Shillong Bah Sanbor Shullai hynne ka sngi Palei, u la plie bad aiti ia ka madan ialehkai bad ka jaka shong peitkai kaba dang shu shna thymmai na ka skhim SUWP 2023-24 jong ka Arya Vidyalaya Secondary School, Jhalupara Shillong.
Ia ka skul Arya Vidyalaya Secondary School, Jhalupara Shillong la seng ha ka snem 1934.
Hashuwa kane u Sanbor Shullai u la pyntip ba ka Cantonment Civil Area ka long kaba khapngiah bha bad kam don jaka ïa ki Khynnah bad ki Samla ban ïalehkai bad ban pynlong ïa ki jingïalehkai bapher bapher ha kane ka jaka.
Ula ong ba kane ka madan ïalehkai ba la shna thymmai kan plie lad bad kan pynbiang ïa ki jingdonkam jong baroh kiba ieid ïa ki jingïalehkai la ka dei iaki samla pule jong ka skul ne ki samla ka thain, ki klob ialehkai bapher bapher jong ka Cantonment Civil Area baroh kawei ban pynlong ia ki jingialehkai bapher bapher na ka bynta ban kyntiew ia ki kam ialehkai.
Ha kane ka prokram la wan ban ïashimbynta ruh da u Ramsevak Prasad Singh, Chief Patron, u Principal u S. K. Singh, u Vice-Principal u A. K. Jha, Secretary u Ravi Tiwari, baroh ki dkhot jong ka Managing Committee jong ka Skul, bad kiwei kiwei.
Baroh ki nongkren ha kane ka prokram ki la ïaroh ïa ka jingtrei shitom jong u Bah Sanbor Shullai daka ba ong ba tang ma u hi u MLA ka thain uba la aiti lut ïa la ka jong ka jingshakri bad trei khlem shongthait ha kaba wanrah ïa ki jait skhim pynroi bapher bapher hapoh ka Cantonment Area baroh kawei khamtam hapoh ka Shillong constituency.
