Guwahati, Nailur 05 : Saw ngut ki dkhot ka kynhun seng lehnoh ULFA (I) la ong ba kila phet krad noh napoh ka ktem aijinghikai hapoh Myanmar bad don ia ka jingthmu ban wan pyndem noh ia lade hakhmat ki bor pahara ha Assam.
Katkum ki khubor la ong ba kine ki sawngut ki dkhot kiba dei na ka kynhun ULFA jong u Paresh Baruah kila phet krad noh na ka ktem aijinghikai napoh Myanmar naduh kane ka sngi Palei ba la lah.
Ia ki arngut na kine ki dkhot kiba la lait phet la tip kyrteng kum u Madhav Asom bad u Girish Asom, ong ka khubor. Hynrei watla katta ia mynta hi ym pat shym la iohi jingtip ha kaba iadei bad ka jaka kaba ki don.
Ka Seng lehnoh ULFA (I) ha ka sngi Balang ba la lah kala rai pyniap ia uwei u dkhot jong ka hadien ba ka iingbishar jong ka kynhun kala shem ba ula leh ia ka kam pyrshah seng da kaba thmu ban phet krad ha ka por ba ka seng kala pynlong ia ka jingkhynra kaba kyrpang da ka jingthmu ban wan pyndem noh ia lade.
Katkum ka jingthoh ba la pynmih da ka ULFA (I), u Rihan Asom ia uba la tip kum u Saiful Islam ula pyrshang haduh laisien kynthih ban phet krad napoh ka ktem kaba don ha Myanmar tang ha kine ki shibnai ba la dep.
U Rihan, uba dei u khun jong u Kalim Uddin Mandal napoh ka shnong Bauratal kaba hap hapoh Lakhipur police, Goalpara district ka Assam.
Kham hashwa, ha kane ka sngi Nyngkong ba la lah, arngut ki dkhot ka seng lehnoh ULFA-I kila shah pyniap noh ha kane ka kynhun namar ka jingshah kynnoh donkti ha ka kam syntiat na ka bynta ki pulit ka Assam.
Ka Seng kala pynmih ia ka jingthoh da kaba ong arngut ki dkhot kiba dang rung thymmai ia kiba la tip kyrteng kum u Dhanjit Das ia uba lat tip bha kum u Roopak Asom uba dei na Barpeta bad u Sanjib Sarma ba la tip kum u Rishav Asom na Baihata Chairali, kila shah pyniap noh namar ki kam syntiat pyrshah ia ka seng lyngba ka jingbthah da ka tnat pulit ka Assam.
