Shillong, Rymphang 17 : Ka Covid-19 bad ka jingpynlut jong ka Sorkar haduh T. 816 klur ban iakhun ia kane ka khlam ha Jylla kala kylla long kawei na ki ishu elekshon jong kiba bun ki seng sain pyrthei na ki rynsan ialap elekshon, kiba la kdew kti beit sha ka Directorate of Health Service (MI) ba ka pyndonkam bakla ia ka pisa hynrei na ki kot ki sla ba ioh lum, la shem pat baka DHS(MI) ka la shu shah pynkylla sohpdung katba ia ka umngap dang bam ei da ka Tnad National Health Mission (NHM) ka Tnad ka Koit ka Khiah.
Ka Jylla Meghalaya kala pynlut haduh T. 8,16, 22,52,312 klur ban iakhun ia kane ka khlam kaba la wan lynshop ha Jylla naduh u Lber 2019 hynrei na kane ka song pisa, ka Tnad DHS(MI) kala ioh ban pyndonkam tang T. 2,48,92,79,344 katba ka National Health Mission kala ioh ban pyndonkam haduh T.567,29,72,968.
Na ki kot ki sla ba ioh lum, ka pisa bala ioh da ka DHS(MI) ka long T.2,40klur na ka Sorkar Jylla bad na ka song pisa ba ai da ka Sorkar Pdeng, kala ioh ban pyndonkam tang T. 8,00,98,000 (T.8 Klur). Kane ka jingkhein ka dei ruh kaba la buh hakhmat ka Iingdorbar Thaw Ain ka Jylla.
Hynrei ka Tnad NHM kaba pyniaid da u Ram Kumar IAS kum u Mission Director, kala ioh iaka bhah ba jan kot 100% na ka song pisa ka Sorkar Pdeng bala ai sha ka Jylla ban iakhun ia ka Covid-19 kaba la kot haduh T.567,29,72,968 watla ka dei tang ka Agency kaba dei pyntreikam ia ki prokram jong ka Sorkar Pdeng.
U Nongpan RTI ba pawkhmat ka Jylla dang shen ula kynnoh ba ka don ka jyrsieh kaba jur bha ha ka jingpyn donkam ia ka song pisa ban iakhun ia ka khlam Covid-19.
Haba twad jingmut na ki Heh Ophisar ka Tnad ka Koit ka Khiah, kila pyntip ba ka jingpan RTI jong une u briew kam shym la wan satia sha ka Tnad DHS (MI) hynrei ka dei kaba iaid na ka Tnad DHS(MCH&FW) bad ka NHM.
Kila ong ba ki kot ki sla ba une u nongpan RTI ula ioh kim pat dei satia kiba pura namar kam pat kynthup lang ia ki jingpynlut jong ka Tnad DHS(MI) namar u khlem shym la pan satia ia ka jingkhein na kane ka Tnad.
Lah ban kdew hangne ba u MLA barim bad kyrtong ka VPP na North Shillong Constituency Bah Adelbert Nongrum dang shen, ula leit ban mudui da ka ejahar halor ka jingkynnoh ba pyndonkam bakla ia ka song pisa ban iakhun Covid-19 ha Jylla bad dawa ba dei ban pynlong ia ka jingtohkit.
Wat u kyrtong ka BJP ban aireng na North Shillong Bah MH Kharkrang ula dawa ba dei ban don noh da ka jingtohkit halor kane ka jingkynnoh bamsap na ka song pisa Covid-19 ban lap ia ka jingshisha baroh.
U Director ka Health Service (MI) barim Dr Aman War uba la mih ban aireng kum u kyrtong ka UDP na North Shillong, ha ka sngi thep kyrteng, ula thalain tyngeh ia ki jingkynnoh pyndonkam bakla ia ka song pisa jong ka khlam Covid-19 bad ula kob ruh ia ki nongkynnoh ban pynlong da ka jingiatai nia hakhmat u paidbah halor kane ka jingkynnoh.
Ka jingmih madan ki kot ki sla bad ki jingkhein jingdiah halor ka jingpyndonkam ia ka song pisa ban iakhun ia ka khlam Covid-19, kala pynphai ia ki khmat mynta sha ka Tnad National Health Mission (NHM) kaba la pyndonkam ia ka song pisa haduh T. 567 klur, kaba hap ban ai jubab kumno ka pyndonkam bad shano ka pisa ka leit.
Ki jingsuba kila mih ruh ba ka lah ban don kaei re kaei ha lyndet kaba hap ban tohkit halor ka jingioh pyndonkam ka NHM haduh T. 567 klur ka pisa watla ka dei tang ka Agency kaba dei ban pyntreikam ia ka flagship programme jong ka Sorkar Pdeng.
Ka jingsuba mynta ka mih ia ka jingdonkti jong ki Heh Ophisar IAS ka Jylla kiba bat ia ka Tnad ka Koit ka Khiah bad ka Tnad Pla Tyngka ka Jylla khamtam ia u Principal Secretary Sampath Kumar, u Mission Director ka NHM Ram Kumar bad u Principal Secretary ka Tnad Finance Vijay Kumar, ban leh sopsop ha kaban pynkupbor ia ka NHM ba kan ioh pyntreikam ia ka song pisa jong ka khlam Covid-19-kaba dei ha ka jingshisha ban hap iaid lyngba ka DHS(MI).
