Shillong, Rymphang 23 : U Myntri Rangbah ka Jylla Conrad K Sangma ha ka sngi Nyngkong, ula ban jur ia ka jingkynshew pisa kum ka engine ka roi ka par ka Meghalaya, haba kdew ia ki plan ban pynioh kham bun ka song pisa ka Sorkar Pdeng bad ban pynkhlain ia ki lad pyniasoh ha ka Jylla.
“Ka jingkynshew pisa kan iai bteng ban long kum ka engine ka roi ka par ka Meghalaya” ong u Conrad haba khein antad ia ka jingkiew ba 67% ha ka jingpynlut lyngba ka SASCI sha ka T.4,500 klur ha u snem 2026-27. Ki skhim ba bei tyngka da ka Sorkar ruh la khmih lynti ba kan kot sha ka T. 6,833 klur.
Ka Jylla ka buh thong ba kot T.15,000 klur ban ioh na ki External Aided Project (EAP) ha ki surok, ka bording, ka koit ka khiah, ki kam pynroi sor bad ka jingai jinghikai ia ki briew ha ka Finance Commission ban wan.
“Ka jingpynkhlain ia ki lad pyniasoh na suin kan dei ka jingpynkylla kaba khraw ia ka Meghalaya” ong u Conrad haba kdew ia ka jingpynheh ia ka lad liengsuin ha Umroi bad ka jingpynjrong ia ka runway sha ka 2,400 meter.
Ka jingai pisa ka kynthup ia ka T.150 klur na ka bynta ka Umroi Airport bad T.50 klur ia ka Baljek Airport ha Tura, kaba la ai sha ka Airport Authority of India (AAI) ba kan pyntreikam.
