Guwahati, Risaw 11 : Watla ka Manipur ka dang don hapdeng ka jingiakhun pyrshah ia ka jingpom pathar ia ki khlaw namar ka kam rep syntiew poppy ban pynmih droks, hynrei kawei ka kompani shimet ba pynmih slasha kala shim ia ka sienjam ban bujli noh ia une u drok da kaba pynkylla ia ki jaka rep sha ka kper slasha.
Kane ka kompani ka dei ka Meckley Tea India ba na Manipur hi, kaba dang shu wan rung thymmai ha ka karkhana pynmih slasha hapoh ka Ri. Kane ka kompani kala pynshew pisa ban pynshlur ia ka jingrep slasha ha Manipur bad kala dep ithuh ruh ia bun ki jaka hapoh ka Jylla ban pynkylla noh kum ki kper slasha ka ban khring ruh ha ki kam jngohkai.
U saiantis slasha P Bordoloi uba dei u Advisor barim ka Toklai Tea Research Association, ka Research Institute ba hakhmat eh hapoh ka Ri, ula pynpaw ba ka suin bneng, ka jingioh slap bad ka khyndew ha ki jaka lum ka Manipur, ki lan ban biang bha ha kaban pynmih ia u slasha ba kynsai hapoh ka pyrthei.
Ka kam jngohkai na ki kper slasha ka dei kaba la kiew bha ym tang ba ki pynshemphang ia ki nongshangkai pyrthei shaphang ka rep slasha hynrei ka lah ruh ban aikam aijam ia ki trai shnong.
U Milam Koijam, Director ka kompani, ula ong ba ka thong ban pynmih haduh 16,826.92 kilogram u slasha da kaba pynkylla ia 7500 hectare ka jaka rep poppy sha ka kper slasha, kan pynmih haduh T. 72 klur ka khjna.
Ula ong ba kane kan iarap ruh ha ka iohkam iohjam bad kyntiew ia ka GDP jong ka Manipur.
