Shillong, Naitung 26: Ka Hynniewtrep Border Dispute Redressal Forum (HBDRF) hynne ka sngi Balang, kala pyntip ba kan sa thoh sha ka Meghalaya Human Rights Commission (MHRC) ban pynsngew iaka jingeh ba iakynduh ki Khasi-Pnar kiba don ha Block I namar ka jingpynibor na Assam.
Ia kane la pyntip da u Chairman ka HBDRF bah Chandame Sungoh uba la kynnoh ba ki artylli ki sorkar jylla kata ka Meghalaya bad Assam kim shim la shimkhia satia ban pynbeit noh iaka jingiakajia khappud hapdeng kine artylli ki jylla.
Haba kren sha ki lad pathau khubor u bah Chandami ula iathuh ba ki paidbah Khasi-Pnar kiba don ha Block I kila mad shibun ki jingeh namar ka jingshah ban bein ha ki Karbi.
Ula iathuh ba ym tang ba Block I hynrei ki Karbi ki pyndik iaki Khasi-Pnar kiba don ba Khanduli daka ba pakhang surok iaki nongleit nongwan khamtam iaki ba pang ba shitom ban leit sha ki jaka sumar bad iaki nongrep ban leit die iaki mar rep.
“Watla ki ar tylli ki sorkar jylla kila mynjur ban pynbeit noh iaka jingiakajia khappud hynrei haduh mynta ka KAAC kam shym la treh ban weng iaka khyrdop na Khanduli bad ki Karbi ruh ki dang bteng ban pakhang surok kaba la ktah iaka iaid ka ieng ki paidbah bad dei namar kane ka Forum kan thoh noh sha MHRC ban pynsngew iaka jingeh ki Khasi-Pnar ha Block I” la ong u bah Chandame.
U bah Chandame ula iathuh baja HBRF kala dep phah daka jingthoh shaka sorkar jylla ban phah weng noh iaka khyrdop jong ka KAAC na Khanduli hynrei haduh mynta kane ka khyrdop ka dang don.
Nalor kane u chairman ka HBDRF ula ong ba ka Forum ka iai dawa naka sorkar jylla ban wanrah biang (Transfer) iaka Block I namar ia kane la dep ban Survey naduh ki 1951 da ki artylli ki district council jong Meghalaya bad Assam.
