Shillong, Nailur 21 : U MLA ka Rambrai-Jyrngam Remington Gabil Momin, ula pynpaw ia ka jingsngewkhia halor ka jingslem ban treikam jong ka Block ba dang shu pynkha thymmai bala tip kum ka Rimuliang C&RD Block ha West Khasi Hills District.
Kane ka Block ka dei kaba la mang tyngka naduh u snem 2022.
“Ka jaka ban buh ia ka Rimuliang Block haduh mynta ym pat lah rai satia. U Deputy Commissioner u donkam ban pynlong ia ka public hearing ban rai ia kane. Haduh mynta, ka Block kam pat treikam satia” ula ong.
Namar ka jingbym don kane ka Block thymmai, baroh ki skhim jong ka Rimuliang Block ki dang hap ban iaid lyngba ka Mawshynrut bad Nongstoin C&RD Block.
U pyntip ba ia kane ka block la pynbna hashuwa jong ka elekshon MLA 2023 bad ka jingpynslem kala pynbitar bha ia ki paidbah ka constituency. “Nga la pyntip sha ka Sorkar, kynthup sha u Myntri ka C&RD artaiew mynshuwa. Ngi la air uh ia ka thup kyrteng jong baroh ki shnong ki ban sa phiah hapdeng ka Rambrai bad Nongstoin Block” ula bynrap.
Haba kylli, u Myntri ka Tnad C&RD AT Mondal ula kular ban sa khmih ia kane ka jingpynsngew jong u MLA bad ong “Ngi dang pynkhreh shaid shaid ban pynlah treikam noh shen ia kane ka block. Katba nang kloi katta nang bha. Ngi la tyrwa ruh ban shna ia ka Building kaba paka na ka bynta ki 9 tylli ki Block Thymmai bala pynkha ha u 2022” ong u Mondal.
Ka Rimuliang C&RD Block kan kynthup haduh 72 tylli ki Shnong kiba kynthup ia ka Langpih Ranighat, Moipara, Umshiak, Salpara, Aradonga, Rangolpara, Rangsapara, Kamphaduli, Athiabari, Umsaitwait, Balapara (Nongshyiap), Sohmarang, Nongdron, Noapara, bad bun kiwei kiwei.
