Shillong, K’lyngkot 12: Ka NEHUSU, KSU Unit, NEHUNSA, NEHUTA bad kiwei kiwei kiba kynhun ba donbyntalang, kila leit iakynduh ia u Myntri ka pule puthi Bah Lahkmen Rymbui, ban kyrpad ba un pynthikna ba ka Pro-VC ka Tura campus kan wan noh sha Shillong Headquarter.
Kane ka jingkyrpad kala mih na ka jingpep kaba la 422 sngi jong u Vice-Chancellor Prof. Prabha Shukla. Kane ka kynhun kala maham ruh ba lada ka Pro-VC kam lah ban shimti iala ka kamram, ka dei ban hiar shuki noh, ban ailad ia kiwei pat ki Professor kiba la ih ha ka kam ba kin shimti kum ki Acting VC.
Haba iakren bad ki nongpathai khubor hadien bala wai ka jingialang, u President ka NEHUTA Prof Lakhon Kma ula ong, “Ngi lah iakynduh ia u Myntri ka pule puthi ban pynpaw ia ka jingbynniaw kum ka skulbah. Ym shim la don VC ne u Pro-VC, Registrar, ne Finance Officer, ym don mano mano ruh bad ka skulbah kala iaid da ka ‘Autopilot Mode’ ha kaba ym don mano mano ruh kiban shim ia ki rai”.
U Prof Kma ula banjur ba ki kyndon treikam kila kdew shai ia ka lynti jong ka jingshimti, ha kaba ka Pro-VC ka lah ban shimti ia ka kam ban pyndep ia ki kamram ha ka jingbym don ne jingpep jong u VC. Hynrei ka Pro-VC, ka Prof F Marak, kam shim la ai jingtip eiei sha ka Shillong Headquarter watla la bthah ia ka ban leh ia katei.
“Ka jingbahkhlieh kadei ha ka, ba kan wan ban pyndep ia ka kamram jong u VC ha Headquarter. Lada kam kwah, kadei ban hiar shuki noh na ka kam kum ka Pro-VC Tura campus,” ong u Prof Kma haba bynrap, ba ki seng ba donbynta lang ha ka kam kila phah ia ka jingthoh sha ka ha kine ki 15-20 sngi kiba la dep, hynrei kala jied ban ym jubab eiei.
“La kyntu ia u Myntri ka pule puthi ba un tuklar bad bthah ia ka Pro-VC ba kan wan shimti ia la ka kamram ne ban kan iehnoh kam, ban ailad ia ki professor kiba la ih ha ka kam ba kin shimti noh kum ki Acting VC,” ula ong.
