Shillong, Naiwieng 12 : Ka North East Students’ Organisation (NESO) ha ka sngi Ba-ar, kala phah ia ka shithi sha u Myntri ka Sorkar Pdeng ba khmih ia ka Tnad Pule Puthi Dharmendra Pradhan ba kyntu ba un tuklar mardor ha kaban lah pynbeit noh ia ki kynrum kynram hapoh ka North Eastern Hill University (NEHU).
Kane kala mih hapdeng ka jingiakhih shah thngan jong ka seng ki samla pule ka NEHU (NEHUSU) ba la kyrshan da ka KSU-NEHU Unit, ban dawa weng noh ia u Vice Chancellor Prof PS Shukla, Registrar, Deputy Registrar bad kiwei ki Ophisar. Ka University kala don hapdeng ka jingkhang dam na kane ka jingiakhih kaba la jam sha ka sngi kaba phra.
“Ka NESO ka kyrshan tyngeh ia ki jingdawa jong ka NEHUSU bad ka KSU-NEHU Unit na ka bynta ki samla pule naba baroh ki jingdawa ki dei kiba shong ain bad kiba donkam kyrkieh ban pynbeit noh mardor khnang ban lah sa shisien ha kaban kyntiew ia ka burom jong ka NEHU kumba long ha ki snem bala leit noh. Ka NESO ka kyrpad ia ka Ophis jong phi ban sngewbha tuklar noh kham kloi khnang ban pynthikna ba ka pule ka dangle kaba janai ha ka thain bad ka Ri kan ym shah iapein” ong u Chairman ka NESO Bah Samuel B Jyrwa ha ka shithi sha u Pradhan.
“Ka jingpyniaid ia ka University hapoh ka jingiakam une u VC ba mynta Prof. Prabhakar Shankar Shukla bad Registrar Col. Onkar Singh (Retd), kala poi ha u pud ka bym lah leh eiei shuh, kaba la pynhiar kyrdan ia ka pule ka dangle, ki jingtei, ka nam jong ka skulabh. Ka jinghiar kyrdan jong ka University ka pyni shai kdar ia ka jingbym lah jong ki bor pyniaid ban pyndep ia ki kamram ba kongsan” ula ong haba bynrap “Shuwa ka jingthung ia u Prof PSShukla kum u VC, ka NEHU ka ju don ha ka kyrdan hapoh ka top 60 na ki University hapoh ka Ri. Hynrei hapoh ka jingialam jong u, ka kyrdan jong ka University kala hiar sha ka kyrdan hapdeng 100-150 tang ha kine ki lai snem. Kane ka jinghiar kynsan ka dei kaba sngewkhia bha bad ka donkam ban pynbeit noh mar mar”.
U Bah Samuel ula ong ba wat hapdeng ki jingpyrshang jong kine ki artylli ki seng ki samla pule ban wanrah ia ki jingsngewkhia jong ki samla pule lyngba ki dorkhas bad ki jingdawa, u Vice Chancellor um shym la lah ban leh eiei ia kine ki kam ba kongsan kaba la ktah ia ka University. Ka jinglong mynthi bad jingbym lah ban shim ia ki sienjam ba kongsan ban pynbeit ia kine ki jingeh kala wanrah ia ka jingbym hun bad ka jingbym shaniah shuh hapdeng ki samla pule.
Haba kdew ia ki kam kiba paw hapoh ka jingialam u Prof Shukla, ka NESO kala ong ba ka University ka iai bteng ban mad ia ki jingeh na kiba bun ki jingduna, kynthup ki jingbym biang ki jingdonkam ha ki Hostel, ka jingbym biang ha ki laboratories, ka jingduna ki nongtrei ban pyniaid beit ia ki kam ki jam jong ki Tnad bapher bapher, Wat haba la mang ia ki kam kiba sah thylli, u Vice Chanellor um shym la lah ban shim ia ki sienjam kiba donkam ban pyndap ia kine ki kam ha ka por kaba dei.
