Shillong, Iaiong 01: Ka North-Eastern Hill University Students’ Union (NEHUSU) bad ka Khasi Students’ Union (KSU) NEHU Unit kala kyntu ia ka Kynhun Myntri ka jylla ban tuklar lem ha kaban phah weng noh mardor ia u Vice Chancellor ka NEHU u Prof PS Shukla.
Ia katei ka dorkhas la aiti ha ki Myntri Sorkar kiba kynthup ia ka Kong Ampareen Lyngdoh bad u Bah AL Hek hynne ka sngi Baar.
“(Ngi) la aiti lang ia katei ka dorkhas, ban kyrpad ba kin tuklar lem mardor ha kaban pynbeit ia ka rukom treikam treijam bad ia ka rukom pyniaid, kiba mad da ka North Eastern Hill University (NEHU). Ngi da kyntu jur ia ka jingkyrshan kaba pura ha kaban pynbeit ia ki kynrum kynram kaba la ktah ia ki samla pule, ki nonghikai bad ki nongtrei, ia kaba ym shim la don ba shimkhia mynta la bun bnai” la pynpaw kitei ki ar tylli ki kynhun jong ki samla pule.
Ha ka dorkhas la pynpaw ruh ba baroh kiba donbynta bad ka NEHU kila iai bteng ban pynlong ia ki jingiakhih pyrshah ia u Prof Prabha Shankar Shukla halor ka jingbym larkam ka jongu ban pyniaid ia ki kam bad halor ka jingkynnoh ba kala don ka jingpyndonkam bakla ia ka bor ha kaban pyniaid ia ki kam jong ka skulbah. Ha kaba iadei bad kitei ki jingeh, ka NEHUSU bad ka KSU NEHU Unit kala pynlong ia ka jingshah thngan ha ka 5 tarik u Naiwieng 2024. La pynsangeh noh ia katei ka jingiakhih hadien ba la ioh ia ka jingkular na ka Sorkar Pdeng ba kan sa leh ia kaba donkam. Kumta kala pynmih ia ka hukum ha ka 14 tarik u Naiwieng 2024, ka Ministry kala thung ia ka Inquiry Committee ban tohkit halor kitei ki jingkynnoh. Ha ka jingwan jngoh katei ka Committee ia ka NEHU, kitei ki kynhun kila aiti ia ki kot ki sla bad ia ki sakhi ki satar ban kyrshan ia ka jingkynnoh ka jongki.
Nalor kane, katkum ka shithi na u Chairman jongka Inquiry Committee ha ka 28 tarik u Naiwieng 2024, ka bor kaba dei khmih kala pynjlan sa 15 sngi ban pynkhreh bad pynbiang ia ki jinglap bad ban aiti ia ka kaiphod. Wat hadien ba katei ka Committee kala dep ban wan jngoh, kam shym la don kano kano ka jingpyntip ne jingshim ia kano kano ka sienjam, da kaba shu ieh ia ka skulbah ha ka jingbteng ban don ha ka umdum.
“Watla ka jinglong jingman kam long kaba biang bad kala don ka jingshah ktah jur na ka jingbym ryntih ka rukom pyniaid ha kaba iadei bad ka pule puthi bad ki kam ki jam jong ka skulbah, ngi ai ka jingshaniah ka jong ngi ha ka jingialam ka jong phi ban ban shim ia ki sienjam ban pynbeit noh ia ki kynrum kynram ia ki mat jingdawa” la pynpaw ka kynhun ki samla pule bad ka bynrap “Ngi kyntu jur ia phi ban pyniaid shakhmat ban phah weng noh ia u Prof. Shukla kum u Vice-Chancellor ka NEHU, ryngkat bad kiwei pat ki ophisar ki bym larkam, ban pynthikna ba kan don ka jingpyniaid beit pyniaid ryntih, ka jingtreikam kaba khuid ba suba bad na ka bynta ka lawei kaba phyrnai jong ka skulbah. Ka jingtuklar mardor bad ka jingai jingkyrshan kan long ka jingiarap ha kaban pynneh pynsah biang ia ka jingdon ia ka kyrdan bad ka bha ka miat jong ka NEHU baroh kawei. Ngi kyrmen skhem ba phin shimkhia ban pyniaid shakhmat ia kane ka kam bad ban ieng ryngkat bad ki samla pule ha ka jingiakhun ban ioh ia ka hok abd ia ka jingkylla”.
 bad ka Khasi Students' Union (KSU) NEHU Unit kala kyntu ia ka Kynhun Myntri ka jylla ban tuklar lem ha kaban phah weng noh mardor ia u Vice Chancellor ka NEHU u Prof PS Shukla.Ia katei ka dorkhas la aiti ha ki Myntri Sorkar kiba kynthup ia ka Kong Ampareen Lyngdoh bad u Bah AL Hek hynne ka sngi Baar.){kind=link}