Phah tuklar ka KSU ha u MP ban bishar thymmai ka NEIGRIHMS ia ka roster register bad rule thungkam

Shillong, Iaiong 10 : Ka Khasi Students’ Union (KSU) kala kyrpad ia u MP ka Shillong Dr Ricky AJ Syngkon ba un tuklar lem halor ka jingdonkam ia ka North Eastern Indira Gandhi Regional Institute of Health & Medical Sciences (NEIGRIHMS) ba kan shong bishar biang ia ka roster register bad ka rule thungkam lyngba ka governing council jong ka.

“(Ngi) kyrpad rit ba phin tuklar lem halor kane ka kam na ka bynta ka jingkiew shaphrang jong kane ka medical institute. Kane ka Institute ka donkam ban shong bishar thymmai iala ka roster register bad ki rule thungkam lyngba ka governing council jong ka. Lada ym leh eiei, ka NEIGRIHMS kan sa pynduh ia ki lad iohkam bad nang hiar kyrdan ha ki snem ban dang wan” ong u President ka KSU samla Lambokstar Marngar ha ka shithi bala aiti sha u MP ha ka jingiakynduh hynne ka sngi Palei.

Haba kdew ia ka thungkam thungjam ba dang iaid mynta ha NEIGRIHMS, kaba la pynbna laitkam ha ka 22 tarik Lber, u samla Lambok ula ong “Ki kam bapher bapher la pynbna ba ki lait kynthup ka Nursing Officer, Store Kepper bad kiwei ha ka Grade/Group B bad C bad ka Seng ka shem ia shibun ki jingbym biang kiba kah ban ktah ia ka jingkiew shaphrang bad ka bha ka miat jong kane ka Institute bad kumjuh ruh ia ka bha ka miat ki riewlum trai muluk ka Jylla”.

Ha ka 24 tarik Lber, ka KSU kala iakynduh ia u Director ka NEIGRIHMS ban pan jingshai bad leit bishar ruh ia ka Roster Register ka NEIGRIHMS ha ka 27 tarik Lber haba iadei bad ka kam sam bhah ha kaba ka seng kala shem ba ki don shibun ki jingleh bym hok ha ka jingshna ia ka roster register.

Ka KSU kala pynbud da ka jingaiti ia ka dorkhas sha u Director ka NEIGRIHMS ha ka 1 tarik Iaiong haba pynpaw ia ka jingshem jong ka seng bad dawa ruh ia ki katto katne ki jingpynbeit na ka bynta ka jingtreikam ba iaid beit iaid ryntih jong ka Institute. “Hynrei kaba sngewsih, ym don kawei ruh ka jingai jingmut kaba la shim bad pyntreikam bad ka jubab ia kane ka dorkhas la aiti ha ka 4 tarik Iaiong, 2025, haba pynpaw ba kim dei kiba shong nongrim bad ki bym iahap” ong u samla Lambok.

Haba iadei bad ka rta thungkam, ula ong ba kat kum ka jingpynbna laitkam, ka rta bala buh pud ia ki nursing officer bad kiwei kikam la pynduna sha ka 30 snem bad ki Pharmacist sha ka 27 snem. Ha ki snem bala leit noh ha ka jingthungkam ha NEIGRIHMS, ka rta bala buh ka ju long 35 snem bad kynsan kynsan la shu pynhiar sha ka 30 snem, kaba la ktah jur bha ia ki samla kiba wadkam. “Ia kane la leh da u Director bad u Deputy Director da ka jingthmu barieh”.

“Namar kata, ka Seng ka sngew ba dei ban pynduhnoh ia ka amendment ha ka Recruitment Rules ba iadei bad u pud ka rta thungkam bad ban buh beit ia ka 35 snem kum ka rta ba khatduh ban iohkam nalor kiwei ki jingpynjynsur ia ki kam bala buh bhah” ong une u Nongialam ka KSU.

Halor ka jingiasam ia ka bhah thungkam (ratio) ia ki nos shynrang bad kynthei, une u Nongialamka KSU ula ong ba ka jing thungkam ia ki nursing officer bala leh ha u snem 2023 lyngba ka NORCET ka dei kaba bakla shibun eh na ka liang ki bor pyniaid ka NEIGRIHMS ha kaba bun ki nos shynrang ki bym lah ioh jinghikai kila shah thungkam. Wat ki nongpyniaid ka NEIGRIHMS dalade kila ong ba ki nos shynrang ki dei kiba “tam” ki bym shym la shah jied ha kiwei ki Institute bad la shu wan bret ha NEIGRIHMS namar ba ki bor pyniaid kim shym la iohi ia ka jingbym don u pud sam kam hapdeng ki shynrang bad ki kynthei kaba long 20:80. Kine ki nos shynrang ki dei bun eh na Rajasthan bad ki bym pat nang ban trei ia ka kam”.

Ula kdew ba Institute kum ka AIIMS, JIPMER bad kiwei ki don ia ka ratio ba 20:80 ha ka jingthungkam ia ki nos shynrang bad ki kynthei bad kynthoh ‘Lada kiwei ki Institute ki lah ban don ia ka 20:80 ratio, kaei kaba khang ia ka NEIGRIHMS ban bud ia kajuh”.

Nalor kane, une u Nongialam ka KSU ula ong ba ha ka jingpynbna laitkam ba mynta ia ki nursing officer, kawei na ki kyndon bala pynpaw ia kito ba pass GNM ka long ba ki kyrtong kiba lah ban aplai ki dei ban don ia ka jingshempahg ba 2 snem na ki hospital ba 50 jingthiah. Kane ka dei ka sien ba nyngkong ba ka NEIGRIHMS kala pan ia ka jingshem phang na ki kyrtong ba aplai kam.
“Ka KSU kam pyrshah ia ka kyndon ba pan 2 snem ka jingshemphang ia ka kam hynrei ka kyndon na ka hospital ba 50 jingthiah dei ban weng noh. Ka daw ka longn ba kane kan pynsangeh lane pynlong ia ki nos na Jylla kiba trei ha ki PHC, CHC bad kiwei ki Hospital ha Jylla kin duh ban aplai namar kiba bun na kine ki jaka sumar kim don satia ia ka 50 jingthiah”.

Haba pynpaw ruh ba ka KSU kam kwah satia ia ka Computer Based Test (CBT) mode, u samla Lambok ula ong “Kum kine ki exam kin long kiba shah liang namar da ka jingduna ki computer centre, kan sa don ka jingphiah ia ka por ban thoh eksam. Ka jingkylli na kawei ka por thoh eksam ka lah ban suk lane eh ban ia kawei pat ka por thoh eksam lane lada dei ban ai biang da kijuh ki jingkylli, ka lah ban long ka jingai kabu ia kiba ialeh eksam hadien. Kumta ka KSU kadawa ba ia ki offline examination dei ban pynlong lyngba ka OMR”.

Haba pynpaw ia ka jingsngewkhia halor ka jingduna ka jingai bhah ia ki ST, u samla Lambok ula ong b aka don 27% ka jingai bhah ia ki OBC bad 15% ia ki SC ha ka jingthungkam ha ki tnad Sorkar Pdeng. Katkum ka jingong jong u, ha ka Jylla Meghalaya, ngi don ia ka Schedule Tribe List bad ka Schedule Caste List hynrei kam don satia ka list ki OBC. Ka Meghalaya kam ithuh satia ia kino kino ki OBC ha ka Jylla. Katba, ka don tang 7.5% ia ki SR ha ka Group B. Ha Meghalaya, haduh 90% ki nongshongshnong ki dei ki riewlum bad kane ka jingai bhah ba duna ia ki ST ka dei ka bym iahap satia. Kumjuh ruh, ka jingai bhah ba palat ia kiwei ki riewlum ki bym don ha ka thup ka ST ka Meghalaya kala nang wanrah ia ki briew ba nabar sha Jylla.

“Kumta, kan iahap eh ba ia ka bhah jong ka ST ha ka Group B dei ban pynkiew. Ka NEHU ka dei ka nuksa kaba biang eh, ba watla ka dei ka Institute ka Sorkar Pdeng, lyngba ki Rule jong ka, kala pynkylla ia ka bhah n aka bynta ka jingbha jong ka University bad ki paid trai muluk ka Meghalaya” ula ong ha ka shithi.