Ba ioh bam da ki jingbam ba pyut bad sma bad dawai bala kut por
Nongpoh, Naitung 31 : U Deputy Commissioner ka Ri-Bhoi District Arpit Upadhaya, ula phah tohkit ha ki Heh Ophisar jong ki tnad bapher bapher kynthup ka District Food Inspector bad PHE ban pynshisha ia ka jingujor jong ki Khynnah Skul ka Jawahar Navodaya Vidyalaya (JNV), Niangbari.
“Hadien ka jingmih ha ki lad pathai khubor, nga la khot ia ki Heh Ophisar jong ki Tnad bapher bapher bad la bthah ia ki ba kin leit jurip bad tohkit halor ki jingujor jong ki Khynnah skul ka JNV khamtam eh halor ka jingioh ia ka bam ba khawot, ba sma bad ka umbam umdih ba saw sarang” ong u DC uba dei ruh u Chairman ka JNV, Niangbari haba iakren bad ka Shlem.
Dang shen, ki Khynnah Skul ka JNV kila phah ia ka jingujor sha ka seng FKJGP-North Khasi Hills, ba pyntip ia ka jingshah leh bein ha ki bor pyniaid ka skul, kiba ai ia ka bam kaba khawot, ba sma, ba pyut bad ka umbam umdih kaba saw sarang. Kila kynnoh ruh ba wat ki dawai dashin la ai da kiba la kut ka por treikam bad ka jingbym ai ia ki sanitary pad ha ka por ba biang sha ki khynnah kynthei.
“Haba bishar ia ki dur ki dar bad ki video kiba la mih ha ki lad pathai khubor, ka long shisha kaba sngewkhia jur ba ki Khynnah kin hap ban mad ia kum kine ki jingeh” ong u Arpit.
“ Nga la khot ia ki Heh Ophisar jong ki Tnad bapher bapher ba nga la bthah ba kin leit jurip sha katei ka skul bad ban aiti ia ka kaiphod sha u hapoh ka arsngi” ula ong haba bynrap “Hadien ba ioh ia ka kaiphod, ngan sa bishar bad sa leh ia kaba donkam”.
Halor ka jingujor ia ki hostel bad ki jaka leit bar, u Deputy Commissioner u pyntip ba un sa shong bishar bniah ia kane ka kam bad ki bor pyniaid ka JNV ba kin shimkhia mardor ha kaban pynbeit ia ki khnang ba ki khynnah kin nym mad shuh ia ki jingeh.
Halor ka jingujpr ki Khynnah ba u Principal ka JNV um ju poi thikna sha skul kynthup ruh ki Nonghikai, une u Khliehduh ka District ula ong “Kum u Chairman ka JNV, ngan sa tohkit bniah ia kane…ki Nonghikai kim dei satia ban shu pep skul khlem kino kino ki daw ba biang bad ka dei ka kamram jong ki ban peit ia ka bha ka miat jong ki Khynnah skul”.
Ka FKJGP-NKH hynne ka sngi kala leit ruh ban buh da ka jingujor hakhmat une u khliehduh ka District bad Chairman ka JNV halor ki jingshem jong ka seng na ka jingleit jurip ia kane ka skul dang shen.
Ka Seng hapoh ka jingialam u Information Secretary Bah Ricky Majaw bad Education Secretary Gabriel Sun, kila dawa ruh ia u DC ba un shimkhia mardor ha kaban pynong ia ka jingtohkit kat kum ka jingujor jong ki Khynnah skul.
, Niangbari.){kind=link}