Shillong, Jymmang 01 : U National President ka National People’s Party (NPP) bad Myntri Rangbah ka Jylla Conrad K Sangma hynne ka sngi Nyngkong, ula phah sngap jar ia ki seng sain pyrthei kiba don ia ka mynsiem arsap da kaba kynthoh ia ka Sorkar ha Jylla bad ki National Party bad ka phaikhmat pat sha Delhi ban ioh ia ka jingiarap.
U Conrad ula kynthoh ia kane na ka rynsan ialap elekshon ia u kyrtong ka NPP Bah Samlin Malngiang, u ban iakhun ia ka elekshon MLA ha Sohiong Constituency, ka ban long ha ka 10 tarik u Jymmang.
“…ki juh ki seng sain pyrthei kin sa leit sha Delhi bad sa leit kyrpad ia ka Delhi ba sngewbha ai ia nga kane, sngew bha ai ia nga katei. Ka jinglong arsap ba kumno shuh? Phin pynlong kamkai ha kawei ka liang bad ha kawei pat ka liang phi dang nud ban dawa” ong u Conrad ha kane ka jingialang.
Haba thalain ia ki seng sain pyrthei kiba kynshoit ia ki paidbah ban don ia ka mynsiem ieid seng riewlum, une u Nongialam ka NPP ula ong “Ki don katto katne ki seng sain pyrthei kiba iai bteng ban kren ha ka lynti ka bym dei bad ki num lah ban sngewthuh ia kaei kaei ruh palat ia ka Khanapara”.
“Ki don katto katne ki briew bad ki seng sain pyrthei kiba kren pyrshah bha. Hynrei kumba nga ong, shisien ba kila leit palat ia ka Khanapara, kin ym lah ban sngewthuh ia kaei kaei ruh lane kin ym lah ban kren eiei” ula bynrap khlem da jer kyrteng iano iano ruh.
Hynrei ula ban jur halor ka jingdonkam ban iatrei ryngkat ha kane ka pyrthei ba mynta, haba kyrpad ia ki paidbad ban iatreilang bad kiwei na ka bynta ka bha ka miat jong ka Jylla bad ki nongshongshnong.
