Shillong, Naitung 14: Ka Catholic Church of Meghalaya, Shillong, kala phah da ka shithi sha ka National Law Commission ba pynpaw ia ka jingpyrshah bad jingsngewkhia halor ka jingthmu ka Sorkar Pdeng ban pyntreikam ia ka Uniform Civil Code (UCC) hapoh ka Ri India.
Ha ka shithi sha ka Law Commission, ka Balang kala kdew ia ka UCC ba ka lah ban ktah ia ka rukom ngeit, ka riti dustur, bad deity tynrai bad ruh ia ka kyndon bala pynkupbor kyrpang jong ki paid riewlum.
Ka Catholic Church of Meghalaya, haba sngew sarong ba ka dei ka Nongshongshnong ka Ri India bad ka nongioh jingmyn toi naka Riti Synshar ka Ri kaba ai jingiada, kala ban jur ia ka jingkongsan ka jingialong kawei jong ki jaidbynriew ba don hapoh ka Ri India bad ruh ka jingburom ia ki niam bapher bapher.
Ka Balang ka mynjur ia ka jingdon ki ain shimet ba khmih ia ka kam iashongkurim, iapyllait sanshyieng, ai pateng bad ai bynta ia ka nongkynti kiba la shong tynrai da ki jingngeit bad rukom leh naduh tynrao. Hynrei, ka jingpynbna ba dang shen jong ka Law Commission ba 14 tarik Jylliew, 2023 halor ka jingpyntreikam ia ka ICC ka dei kaba la sngewkhia jur bha.
Ka Balang kala pynpaw ia ki jingpyrshah halor ka jingpyntreikam ia ka UCC ha India da kaba kdew ia ki mat ba kongsan.
Ka jingiada ia ka jingngeit niam : Ka Balang ja pynpaw ia ka jingbym mynjur ia kano kano ka jingpyrshang ban buh kyndon ia ka rukom ngeit, ka riti dustur bad deity tynrai jong kawei ka Niam halor kawei pat lyngba ka UCC. Kala ban jur ba ki ain shimet kila mih na ki riti dustur bad deity tynrai ba don jingiadei bad ka jingngeit niam ia kibym dei satia ban pynduh ne ktah. Ka Balang kala kdew ia ka Article 25 jong ka Riti Synsahr ka Ri kaba pynkupbor ia baroh ki kynhun Niam ia ka hok ba kin pyniaid iala ki jong ki kam.
Ka jingpynkupbor ia ki paid riewlum : Ka Riti Synshar ka Ri India, lyngba ka Article 341, 342 bad ka Sixth Schedule, kala pynkha ia ki kyndon ba kyrpang ban pynkupbor ia ki paid riewlum. Ka Balang kala pynpaw ia ka jingsngewkhia ba ka jingpyntreikam ia ka UCC ka lah ban pynduh noh ia kine ki hok ba kyrpang bala ai sha ki dkhot jong ki paid riewlum.
Ka jingdonkam ba kyrkieh : Ka Balang ka buh jingkylli halor ka jingleh kyrkieh ha lyndet ka jingtynruh ka Sorkar Pdeng ban pyntreikam ia ka UCC khamtam wat hapdeng ki jingpynsngew jong ka Law Commission ba 21 ha u 2018. Ha katei ka por, ka Law Commission kala ong ba ka Uniform Civil Code kam dei satia kaba donkam lane kaba kwah ban don.
Halor kine kiei kiei baroh, ka Catholic Church of Meghalaya ka kyrpad jur ia ka tnad ba dei khmih bad ka Sorkar India ba kan pyrkhat biang ia ka jingpyntreikam ia ka UCC ha kane ka Ri. Ka Balang kala ban jur ia ka jingdonkam ban bat ia ka jinglong laitluid ki seng niam, ban iada ia ka hok ki jaidbynriew bapher bapher bad ban pynneh ia ka jingburom ia ki jingngeit niam bapher bapher hapoh ka Ri.
