Shillong, Jymmang 09 : Ka Iingkashari Meghalaya High Court hynne ka sngi Ba-ar, kala bthah ia ka Sorkar Jylla ban pynpaw ia ka kyrteng jong ki briew kiba donkti ha lyndet ka jingseng ia ki karkhana coke ba beain bad ka sienjam bala shim ban ai ka jingpynsajia ia ki kat kum ka ain.
“Kane ka kam kan wan biang sha ka jingbishar hadien saw taiew..kumta ka Sorkar Jylla ka dei ban pynpaw ia ka kyrteng jong ki briew ba donkti ha lyndet ka jingmih ki karkhana coke ba beain bad ki sienjam bala shim kat kumka ain ban ai ka jingpynsajia ia ki” ong ka Iingkashari Full Bench bala khlieh da u Chief Justice Sanjib Banerjee ha ka hukum ba pynmih haba bishar ia ka mukotduma bala mudui da u Shailendra Kumar Sharma.
Ka Iingkashari kala bynrap “ U Justice Kakatey khlem jingartatien, un pynthikna ba kine ki karkhana coke ba beain kim dei ban treikam shuh shuwa ka por ba kan don ka jingbishar biang ia kane ka mukotduma”.
U K Khan, Additional Advocate General ula kdew ia ka kaiphod ba 12 jong u Justice BP Katakey bala ai halor ka kam ba iadei bad ka jingtih beain bad khaii ia u dewiong ha ka Jylla bad katto katne ki paragraph kiba pynpaw ba kumno ki karkhana coke kila treikam beain bad khlem da ioh jingbit, kila shah khangdam.
U Nongiasaid ula ban jur ba haduh 57 tylli ki karkhana coke ba treikam beain kila shah khang dam bad ka Sorkar kala shim ia ka sienjam pyrshah ia kiwei pat kiba khlem lah ban pyni ia ka jingbit ban trreikam lane batai ia ka tyllong ba ki ioh ia u dewiong ban pyndonkam ha ki karkhana.
Ka Iingkashari ka shem ba watla la tynrong ha ka Sorkar Jylla bad u Chief Secretary ban pynthikna ba ki par dewiong ba beain ki khlem treikam shuh, hynrei ka kam karkhana coke kala jyllei tad haduh ka mukotduma suo moto bala shim da ka Iingkashari ba kala don ka jingteh kyndon lane tehlakam ia kane ka kam.
Ka Iingkashari kala buh ban shong bishar biang ia kane ka kam ha ka 8 tarik u bnai Jylliew.
