Shillong, Nailur 13: Ka Meghalaya High Court ha ka Lah Sngi u Blei kala bthah ba ki ar tylli ki jingtei kiba la tei hajan ka pung Umiam, dei ban pynpra noh iaki lada jia ba la tei iaki khlem da ioh ia kano kano ka jingbit.
Haba bishar iaka PIL, halor katei ka mat, ka iingkashari kabala khlieh da u Chief Justice Sanjib Banerjee bad u Justice W Diengdoh kila pynmih iaka hukum “Lada ki ar tylli ki jingtei kidei kiba la tei khlem ka jingioh jingbit kumta katkum ka jingbud ryntih ia ki kyndon aiñ dei ban pynpra noh iaki”.
Ka hukum kala ong, katkum ka jingtian bishar iaka hukum kaba la pynmih haka 11 tarik u Nailar, ka sorkar kala pyntip ba kila don ka jingtei ia ar tylli ki building hajan ka Pung Umiam bad ka jingtei ia ki kala long khlem kano kano ka jingioh jingbit ne jingmynjur.
Ka sorkar kala ujor daka Affidavit kaba kdew ba kala dep ai da ka notis khang khyrdep ne Closure Notice.
Ka iingkashari kala kynthup lang ruh iaka Khasi Hills Autonomous District Council (KHADC) kum kaba don mamla lang ha katei ka kam, namar ba ka jaka kaba don kitei ki jingtei ka lah ban longtrai ne hap hapoh ka jingkhmih jongka.
U Nongiasaid aiñ jong ka jylla yn sa kdew ia ki trai jong ki ar tylli ki jingtei kiba la tei be-aiñ ban long kaba don mamla lang ha kaba iadei bad katei ka mukotduma bad yn sa phah iaka notis.
Ka jingtian bishar ia katei ka mukotduma kan long biang haka 22 tarik mynta u bnai.
