Shillong, Naiwieng 14 : Ka Iingkashari Meghalaya High Court kala phah notice sha u Lamphang ka Iingdorbar Thaw Ain ka Jylla Thomas A Sangma halor ka mudui jong ka Congress ba pyrshah ia ka hukum jong u halor ka jingdawa ban mait kyrteng ia ki MLA ba phet seng.
Ia kane ka mudui la ai da u Secretary ka Meghalaya Pradesh Congress Committee (MPCC) Bah Manuel Badwar.
U Bah Manuel ula tynjuh pyrshah ia ka hukum ba dang shen ba lah pynmih da u Lamphang ka Iingdorbar Thaw Ain kaba kyntait ia ka jingmudui jong u ban mait kyrteng ia ki 4 ngut ki MLA ka Congress kiba leit pyniasoh sha ka National People’s Party (NPP) kaba don ha ka Liang Synshar.
Ha ka jingbishar, u Advocate General A Kumar, bala iarap da u Advocate ka Sorkar S Laloo, kila pdiang ia ka notice na ka bynta u Lamphang.
Ha ka hukum ba pynmih ha ka sngi Thohdieng, ka Iingkashari ba khlieh da u Justice HS Thangkhiew kala hukum ban phah notice sha kiwei ruh ki kynhun liang mamla hapoh ka laisngi.
U Advocate General ula pynpaw ia ka jingpyrshah haba iadei bad ka jingbynrap lang ia ka writ petition pyrshah ia ki saw tylli ki hukum ba dang shah tynjuh.
Haba jubab, u nongiasaid jong u nongmudui KV Kharlyngdoh ula kyrpad bad la ai jingbit ba un ioh ia ki jingbthah ia kane ka kam, kaba la pynjlan ban bishar sha ka 8 tarik Nohprah 2025.
