Shillong, Naitung 19 : Ka District Election Officer (DEO) ka East Khasi Hills, kala phah notice sha ki khyndai tylli ki seng sain pyrthei ka Jylla halor ka jingpyndonkam ia ki Khynnah ha ki kam ialap elekshon.
Kine ki seng sain pyrthei ki kynthup ia ka National People’s Party (NPP), Voice of the People Party (VPP), Indian National Congress (INC), Hill State People Democratic Party (HSPDP), People’s Democratic Front (PDF), United Democratic Party (UDP), All India Trinamool Congress (AITC), Bharatiya Janata Party (BJP) bad ka Khun Hynniewtrep National Awakening Movement (KHNAM).
Ia kane ka notice la phah ha ka 6 tarik Naitung sha kine ki seng sain pyrthei ba bthah ruh ba ki dei ban kiar na ka jingpyn donkam ia ki khynnah ha kino kino ki kam ba iadei bad ka jingialap elekshon.
Kat kum ka notice la ong ba ha ka elekshon MLA 2023, la ioh pdiang ia ki jingujor ha kaba ki seng sain pyrthei la kynnoh ba kila pyndonkam ia ka jingshakri jong ki Khynnah ha ki kam elekshon ba iadei bad ka jingiaid ialap elekshon, iaid rally, iaid pyrta slogan bad kiwei kiwei.
Kane ka long wat hapdeng ka hukum ba khang ban pyndonkam ia ki khynnah ha ka por elekshon bad jingialap elekshon bala pynmih da ka National Commission for Protection of Child Rights lyngba ka shithi ba 20 tarik Kyllalyngkot, 2017 bad jong ka Election Commission of India (ECI) ba 21 tarik Rymphang, 2017.
“Khnang ban khang ia kum kane ka kam hadien habud kata ban pyndonkam ia ki khynnah khamtam mynta ba kan don ka elekshon jong ka KHADC 2024 bad ka Elekshon Lok Sabha, 2024, ka long kaba donkam ba dei ban phah ia kine ki jingbthah sha baroh ki seng sain pyrthei” ong ka notice.
“Namar kata, halor kine ki mat bala kdew haneng, baroh ki seng sain pyrtheo la bthah ba kin kiar pyrrkhing bha ha ka jingpyndonkam ia ki khynnah n aka bynta ki kam ialap elekshon lem kumta yn leh tyngeh ia ki kat kum ki kyndon jong ka Ain” kala bynrap.
