Shillong, Jylliew: U MDC ka NPP na Rambrai-Jyrngam Constituency, Bah Bajop Pyngrope ula ong ba kito ki briew kynthup ki Nongmihkhmat paidbah kiba khyrwit bad diang bad mon ia ka Sorkar Meghalaya Democratic Alliance (MDA) ba ialam da ka NPP halor ka kam iapynbeit pud,ba ki dei ban da leh homework hashuwa ba kin kynthoh ne kren laplah kat shaba lap ba shem.
Une u MDC ula kynthoh ia kane halor ka jingkynnoh jong ki katto katne ki MDC ka UDP ia ki MDC ba NPP ba ki la kynran dien na ka rai ban ujor sha Iingkashari pyrshah ia ka jingsoi soskular Memorandum of Understanding (MoU) hapdeng ka Sorkar MDA bad ka Sorkar Assam ban pynbeit noh ia ka jingiakajia pud ha ki hynriew tylli ki jaka.
“Kam dei satia ba ki MDC ka NPP kila kynran dien hynrei dei namar ba ka Council kala rai ba kan ailad ia ki Himakiba don ia ki kot ki sla ba kin iaid shakhmat ha kaban ai ia ka mukotduma” ong u Bah Bajop.
Une u MDC uba dang shu pyniasoh dang shen na ka Congress, ula ong “Ngi na ki MDC ka NPP ngim shym la pyrshah ia ka rai hynrei ngim sngew iahap satia ban leit sha Iingkashari lyngba ka District Council naba ka Council kam don satia ia ki kot ki sla lait na ki Hima. Ia kane la rai ruh da baroh ki MDC kia la iadonlang ha ka jingialang bala lum da u Chief Executive Member (CEM)”.
Haba pynkynmaw ba kane ka MoU ka dei kaba la iasoi kat kum ka kaiphod jong ki Regional Committee kiba la khlieh da ki Myntri Sorkar na ki party bapher bapher kynthup ka UDP, HSPDP bad kwei kiwei, u Bah Bajop ula ong “ Ka West Khasi Hills lei ka iohnong bha na kane ka jingiapynbeit pud jong ka kylla kaba nyngkong namar ka Tarabari Sector ha ki por ba mynshuwa kam hap satia sha Meghalaya hynrei mynta kane ka jaka kaba don umba 12 ne 13 tylli ki Shnong kala wan sha Meghalaya na ka daw ka jingbit jingbiang ka synshar khaddar”.
Nalor kane, une u MDC ula ong ba ha ka Constituency ka jong u, ym shym la don ruh wat tang kawei ka shnong ka ban leit sha Jylla Assam.
Ula ong ruh ba kane ka jingiakren iasuk kala pynmyntoi bha ia ka thain West Khasi Hills kaba la lah mynta ban pyntrei ia ka surok PMGSY na Athiabari sha Umshek, Assam.
