Shillong, Nailur 04 : U Symbud Myntri Rangbah ka Jylla Bah Sniawbhalang Dhar, hynne ka sngi Balang, ula phah da ka Legal Notice sha u President ka Meghalaya Pradesh Congress Committee (MPCC) bad MP barim ka Shillong Bah Vincent H Pala, ba dawa panmap khlem pud hapoh 7 sngi namar ki jingkynnoh ba khlem nongrim bad ruh ban siew ia ka bai mynrainkhmat ba kot haduh T.100 klur.
Ia kane ka Legal Notice la phah da ka Sharan & Associates LLP Advocates and Solicitors, kaba don ia ka Ophis treikam ha Barakhamba Road, New Delhi.
Kane ka legal notice ka long pyrshah ia ka jingkren u Bah Vincent Pala ba kynnoh ba u Bah Sniawbhalang Dhar u dei u “Nongaiktien” ka Rashtriya Swayamsevak Sangh (RSS) bad ka Bharatiya Janata Party (BJP) namar ba u don hapoh ka jingshah buddien ha ka CBI.
U Bah Vincent Pala ha ka jingiakynduh bad ki lad pathai khubor ha ka 22 tarik Nailar ula kynnoh “U Bah Sniawbhalang Dhar u dei u Nongaiktien ka RSS. Ka RSS lane ka BJP kat shaba ki don, ka sur jong ki ka dei ka Congress Mukt. Kumta u Bah Sniawbhalang Dhar u hap ban pynsngew ia kane lem kumta kin tip lut ia baroh ki kam be-ain naduh u droks, u dewiong bad kiwei kiwei kiba la leh da u Bah Sniawbhalang Dhar bad ki paralok”.
Ula kynnoh ruh da kaba ong ba u Bah Sniawbhalang u don hapoh ka jingpeit pyrman ka CBI, une u Heh Congress ula ong “Nga la dei u MP, Nga tip. Ki ju wan sha nga ban pan jingtip. Baroh ki files kila don ha miej jong ki. Ka por kan sa poi bad ngin sa iohi uei u Bah Sniawbhalang. Ka histori kan sa iathuh uei u Pala bad uei u Sniawbhalag?”.
Ka Sharan and Association ha kane ka notice bala phah sha u Bah Pala kala ong “U briew jong ngi u kubur ba ka jingbat ia ka kam paidbah ka ju khring ia ki jingpynrem ba bun jait, hynrei ka jingpynpriang ia ki khubor lamler bad ki jingkynnoh ba long beain ka dei ka jingpyrshang ban pynthohbria ia ka burom jong u. Ka jngkren ha ka jingiakynduh bad ki lad pathai khubor ka dei kaba la thmu ban pynthohbria ia u (bah Sniawbha) tang ban myntoi ialade shimet”.
“Ngi, namar kata, ngi thoh ban dawa ia phi (a). Thoh ia ka shithi ba la weng ia ka jingkren bad pan map ia kaban ai jingmynjur da ma ngi na ka bynta u briew jong ngi (clients) bad ban pynmih ia ka ha baroh ki Kot khubor ba iaid iew bha. (b) Ai ia ka jingkular da ka jingthoh ba phin nym pynmih biang ia kum kine kijuh ki jingkynnoh ba long pyrshah ia u briew jong ngi (clients) bad (c) siew ia ka jingpynthohbria ba kot T. 100 klur kum ka jingpynmynrain ia u briew jong ngi (clients) bad (d). siew ia ka bai lut baisep jong u briew jong ngi (clients) ba ula pynlut ha kane ka kam”.
“Hadien kane, la bthah ia phi ban nguid noh iala ki jingkren sha ki lad pathai khubor bad ban pynmih ia ki jingpanmap paidbah ia u briew jong ngi (clients), haba kubur ba ki jingkren ki dei kiba thoh bad ki bym shongnia. Phi dei ruh ban ai da ka jingthoh ia ka jingpanmap nalor ka jingkular ban nym mlien shuh ban pynmih ia kum kine ki jingkynnoh hapoh ka 7 sngi naduh ka sngi ba phi ioh pdiang ia ka Legal Notice via WhatsApp/e-mail/speed post, kat kiba poi kloi” ong ka notice.
“Nalor kane, phi de ruh ban bthah ia ki social media platform bad website ba kin weng noh ia kino kino ki khubor electornic jong ka jingiakren ba ki lad pathai khubor bala pynmih online” kala bynrap.
Kala maham ruh, ‘Sngewbha la ai jingmut ba lada pep ban leh ia kine ki kyndon bala kdew ha ka notice hapoh ka 7 sngi yn sa shimkhia bha bad u briew jong ngi (bah Sniawbha) um banse ban shim ia ka lynti jong ka Ain ha ki Civil court kynthup ka mukotduma bai mynrainkhmat, bad kumjuh ruh ia ka jingujor kam bymman ba lah ban pynsajia kat kum ka kyndon 351 bad 356 jong ka BNS, 2023.
 bad ka Bharatiya Janata Party (BJP) namar ba u don hapoh ka jingshah buddien ha ka CBI.){kind=link}