Shillong, Nailur 21 : Ka Tnad Pulit ka East Khasi Hills, kala phah ia ka ejahar jong ka Booth Level Officer (BLO) sha ka Iingkashari ba kan rai shim bishar haba pyntip ruh ba la pynngat case kat kum ka lynti jong ka Ain pyrshah ia ki shikurim kiba pynthohbria ia kane ka BLO.
Kine ki arngut ki shikurim ki dei kiba la tip kyrteng da u Amir Nongbri bad ka kong R Rymmai kiba sah ha Thranghok Rangad Road, Laban.
I Booth Level Officer (BLO) Kong Banrikynti Ryntathiang iba trei ha Meghalaya Legislative Assembly bad ba shah thung shipor kum I BLO ha ka Election Commission, ila leit sha ka Iingsah kine ki shikurim ha Laban ban pan ia ki jingtip ba la bthah da ka Election Commission ban lah pyniasoh ia ka EPIC jong ki bad ka Aadhaar.
Hynrei la kynnoh ba ka Kong R Rymmai kala shondur pynban ia ine I BLO bad pynsaphriang lyngba ka Whatsapp ha ryngkat ka jingthoh ba phah husiar ia ki briew halor ka jingwan rung iing jong I hapoh Laban namar ka jingkam ba wan na ka ECI.
I Kong Banrikynti ila ioh jingtip ruh ba u Kurim jong kane ka briew Bah Amir Nongbri ba trei ha Ophis u Superintendent of Police, Shillong ula pynsaphriang ia ka dur jong ki ha kylleng ki jaka.
Haba pyntip ba ki Pulit ka District kila phah ia ka ejahar jong ine i BLO sha ka Iingkashari , u Superintendent of Police (City) Bah Vivek Syiem ula ong “Ki Pulit ka District ki kwah ban kyrpad ia baroh ba kin kiar na ka jingpynsaphriang ia ki jingtip ki bym shisha, ym ban pynthohbria iano iano khlem da tip ia ka jingshisha lem kumta kan khring ia ka jingpynsajia kat kum ka Ain”.
Une u Heh Pulit ula kyntu ruh ia ki Rangbah Shnong bad ki bor pyniaid Shnong ba kin pynthikna ha kaban pynbna paidbah ha ki shnong ki thaw lyngba ki PA System lada don kum kine ki jingwan lum jingtip na ki bor Sorkar.
“Ngin leh da kaba tyngeh ia kino kino kiba pynthut ia kito kiba wan pyndep ia ka kamram naka bynta ka elekshon ban wan” ula maham.
