Shillong, K’lyngkot 31 : U Myntri Rangbah ka Jylla Conrad K Sangma ha ka sngi Balang ula ong ba ka jingweng noh ia ki case pyrshah ia ki Nongialam bad dkhot ka seng Hynniewtrep National Liberation Council (HNLC) kan shong ha ka rukom long jong kawei pa kawei ka case.
Kat kum ka jingong jong u, ia ki kyndon iakren iasuk hi ym lah da lei lei ban pynkylla namar ki dei kiba pyntreikam ia baroh ki kynhun kiengatiar.
Lah ban kdew hangne, ka HNLC kala weng noh ialade na ka jingiakren iasuk bad ka Sorkar ha ka 3 tarik Kyllalyngkot da kaba ong ba ka Sorkar kam shym la mynjur ban pyntreikam ia ki 5 tylli ki mat jingdawa ba hakhmat jong ka seng kiba kynthup ia ka jingweng noh ia baroh ki case pyrshah ia ki Nongialam bad ki dkhot jong ka seng.
Haba iakren bad ki nongthoh khubor, u Conrad ula ong ba ka kam ba iadei bad ka jingmap noh ia ki kam bymman jong ki dkhot ka HNLC, ka dei kaba la iakren halor ka jinglong jong kawei pa kawei ka case.
“Ngi la dep iakren ia kane ka kam bad hooid haba bishar ia kawei pa kawei ka case, ki don katto katne kiba shyrkhei shaba palat liam. Namar kata, ia kiei kiei baroh yn hap ban khmih la la ka jong, hynrei kane kam mut pat ban shim ba ka dei ka hukum ba salonsar ba ong ba lah weng noh ia baroh ki case..kan shong na kawei ka case sha kawei pat” ong u Myntri Rangbah.
Haba ban jur halor ki kyndon iakren iasuk, u Myntri Rangbah ula ong ba ki don da ki kyndon ba ju buh ha man ki jingiakren bad kumta, lada ka Sorkar ka pynkylla ia kine ki kyndon ia katto katne ki kynhun, kane kan buh jingeh ban wanrah ia ka rynsan ba kumjuh ia kiwei pat ki kynhun. U Myntri Rangbah ula ong ba ia ki kyndon bala buh jong ka jingiakren iasuk hi ka dei ka bym lah ban pynkylla.
Haba kylli, u Conrad ula ong ba ka Sorkar ka dang iohi tang ia ka shithi na ka HNLC ba phah ktien ia ka rai ban nym bteng shuh ia ka jingiakren isuk. “Kumta, ngi la kyrpad ia ki (HNLC) ba khmih kin don beit ki jingtynjuh, kin mih beit kiei kiei ki bym lah ban iapynbeit bad khatduh hi ka jingangnud ka long ban ioh ia ka jingsuk kaba dei kaba kongsan tam”.
Haba iai ban biang ba ka Sorkar ka dang kloi ban iakren bad ka HNLC, u Myntri Rangbah ula kyntu ia kane ka kynhun ba kan pyrkhat biang sa shisien ia ka rai bad ban bteng biang ia ka jingiakren iasuk.
