Shillong, Lber 01: Ka United Democratic Party (UDP) Sohiong kala phah daka kyrteng jong u bah Synshar Lyngdoh, ban mih bujli ia u bah HDR Lyngdoh (Bam Kwai Dwar U Blei) ban iakhun ia ka ilekshon MLA-2023 na Sohiong konstitwensi.
Ka Election Commission of India (ECI) kala pynsangeh shwa iaka ilekshon ha Sohiong konstitwensi hadien ka jingkhlad noh u kyrtong ka UDP bah HDR Lyngdoh (Bam Kwai Dwar U Blei) haka 20 tarik Rymphang 2023.
Haba kren sha ki lad pathai khubor, u President ka UDP East Khasi Hills district bah Titosstarwell Chyne ula iathuh ba iaka kyrteng jong u bah Synshar Lyngdoh u ba dei ruh u pyrsa trai jong u bah HDR Lyngdoh (Bam Kwai Dwar U Blei) la phah hi daka UDP Sohiong circle bad naka liang ka party kan sa shong pyrkhat bha hashuwa ban shim iaka rai ba khatduh.
U bah Titos ula ong ba hadien ka jingpynbna naka ECI haba iadei bad ka tarik ban pynlong ilekshon ha Sohiong konstitwensi, ka State Election Committee (SEC) jong ka UDP ruh kan sa shong jingialang ban shim rai khatduh halor u kyrtong jong ka Party ban iakhun iaka ilekshon.
“Nga la ioh pdiang iaka shithi naka UDP Sohiong circle haka ba, kila phah iaka kyrteng jong u bah Synshar Lyngdoh u ba dei u pyrsa jong u bah HDR Lyngdoh (Bam Kwai Dwar U Blei) ban mih bujli ban iakhun iaka ilekshon na Sohiong” la ong u bah Titos.
U bah Titos ula ong ba kum u president ka UDP East Khasi Hills District un rah ia kane ka jingai jingmut ka UDP Sohiong sha ka SEC jong ka Party ba kan shim iaka rai ba khatduh.
