Phah ka Sorkar Pdeng haduh 5 pyrton ki CRPF, RAF sha Meghalaya hadien ki kam thombor ha Shillong

Shillong, Nailar 20 : Ka Ministry of Home Affairs (MHA) kala mynjur ban phah mardor ia ki bor pahara ka Sorkar Pdeng sha Meghalaya hadien ba mih ka huri hura bad ki kam thombor ha East Khasi Hills na ka rally thuk thuk ka Khasi Student’s’ Union (KSU) ha Shillong.

Ha ka shithi, ka MHA kala ong ba kan ai saw pyrton ki CRPF bad shi pyrton ka kynhun Rapid Action Force (RAF) tah haduh ka 25 tarik Nailar ba kin iarap lem ia ki Pulit ka Jylla.

Kane ka sienjam kala wan hadien ba ka tnad kam Pohiing (Police) ka Jylla kala thoh sha ka Sorkar Pdeng ia ka jingsniew kynsan kynsan ka jinglong jingman hapoh ka District, tang da ki kynta hadien ka rally thuk thuk ka KSU kaba la kylla sha ki kam thombor.

Ha ka sngi Balang, ka rally kala sakhi ia ki kam thombor kynthup ki jingkawang maw, kaba pynjulor haduh 31 tylli ki kali, jingthang ia ki kali Sorkar bad shoh dusmon ia ki nongiaid nongieng ha ki jaka kum ha Firebrigade, Nongmendong, Polo, Barik bad Mawlai.

Haba leh eiei kat kum ka ain halor kine ki jingjia, ki Pulit ka Jylla ha ka miet sngi Balang kila kem ia nongialam ka KSU ba kynthup ia u President samla Raymond Kharjana, Vice President samla Pynkmenlang Sanmiet bad u General Secretary samla Reuben Najiar.

Ki Pulit ki pyntip ba kila pynngat ia kine ki nongialam ka KSU ha ki kyndon bapher bapher jong ka Bharatiya Nyaya Sanhita 2023, namar ka jingpynjulor ia ki nongkynti paidbah, pynmynmaw ia ki riew paidbah ba iaid ba ieng bad kiwei kiwei.

Kane ka jingkem kala wan jia tang da ki kynta hadien ba ki nongialam ka KSU kila iakynduh ia ki lad pathai khubor ban pynpaw ia ka jingsngewkhia halor ki kam thombor ba jia ha ka rally thuk thuk bad kam ruh ba ki riewshimkabu kila ioh bsuh khlieh hapoh ka rally ban pynpulom ia ka jingiakhih.

Ki Pulit kila leit khynra ia ka Ophis ka KSU ha Jaiaw ha ka por shiteng miet, bad lam ruh sha ka jingsiat ia ki tyndong lyer pynsat khmat namar ka jingialeh pyrshah ki dkhot ka KSU.