Shillong, Rymphang 19 : U Myntri Rangbah ka Jylla Conrad K Sangma ha ka sngi Nyngkong, ula pyntip ha Iingdorbar Thaw Ain ba ka Sorkar kala buddien khlem shongthait bad ka Sorkar Pdeng ban pynrung noh ia ka ktien Khasi bad Garo ha ka khyrnit ba phra jong ka Riti Synshar ka Ri India.
“Ka dei ka kam ba dang iaid bad ngi la iai tynruh na ka liang jong ngi..Ngi dang iai bteng ban buddien ia kane ka kam bad ka Sorkar India” ong u Conrad haba jubab ia ka jingkylli bala wanrah da u MLA ka VPP na Mawryngkneng Heavingstone Kharpran.
Ula ong ba ka resolution ban pynrung ia ka ktien Khasi bad Garo ka dei kaba la mynjur da ka Iingdorbar naduh u snem 2018.
“Haduh phra tylli ki shithi ngi la phah sha ka Sorkar India (ba kan ai jingmynjur)” ong u Conrad haba bynrap “Ka Sorkar India (ha ka jubab sha Jylla) kala ong ba kam don satia kanp kano ka kyndon bala buh thik ban pynrung (ia kano kano ka ktien) ha ka khyrnit ba phra jong ka Riti Synshar ka Ri.
Hynrei ula ong ba kam shym la don ka jingpynshai ne ka jingbatai bniah kaba wan na ka Sorkar India halor ki daw ba slem ban pynrung ia kine ki artylli ki ktien ha ka khyrnit ba phra.
Haba pynpaw ba ka dei ka Sorkar MDA-I, kaba la shim ia ka sienjam ban mynjur ia ka resolution ha u Nohprah 2018 bad ong, “Kane ka dei naduh kaba sdang (ka samoi treikam jong ngi) bad ka pyni ia ka jingkut jingmut bad ka jingkitkhia ban lah pynrung noh ia ka ktien Khasi bad Garo ha ka khyrnit ba phra. Ngi la iai bteng ban buddien bad ka Sorkar India bad ruh bad u Myntri kam Pohiing ka Ri Amit Shah”.
Nalor kane, u Myntri Rangbah ula ong ba ka ktien Khasi bad Garo ki dei napdeng ka thup jong ki 38 tylli ki ktien kiba dang sahkut bad ka MHA, haba jubab ia ka jingkylli jong u MLA ka Congress na Mawhati Bah Charles Marngar uba la ong ba hato ka jingpynslem ka MHA ban shim rai ka dei namar ka daw ba ka Sorkar kala phah ia ka jingtyrwa ha kajuh ka por ban pynrung lang ia ka ktien Khasi bad Garo.
U Bah Charles ula ai nuksa ba ka Sorkar Pdeng ha u 2003 kala ai jingithuh tang ia ka ktien Bodo watla ka Sorkar Assam kala phah ia ka jingtyrwa ban pynrung lang ia ka ktien Karbi”.
