Shillong, Nohprah 11: Ka Meghalaya hynne ka sngi Nyngkong, kala sakhi ia ka jingsdang jong ka kam shalan ia ki mar ba pynmih na u sohniamtra sha Dubai kaba long haduh 20 metric ton, ha ka jingialang bala pynlong ha IATC, Upper Shillong.
Kiba la iadonlang ha kane ka jingialang ki kynthup ia ka Myntri kam rep Kong Ampareen Lyngdoh kum ka Kongsan bad u MLA ka Mylliem Bah Ronnie V Lyngdoh nalor kiwei kiwei ki kynrem ki lyndan.
La wan iashimbynta ruh da ki nongmihkhmat na ka Apeda bad ka LuLu group, kaba pynpaw ia ka jingiatreilang kaba khlain ban nang kyntiew ia ka kam shalan ia ki marrep na Jylla.
Haba ai jingkren, ka Kong Ampareen kala ban jur ia ka jingkut jingmut ba skhem jong ka Sorkar Jylla ban kyrshan ia ki nongrep.
Hukum ka Iingkashari ban lilam noh ia 5.50 lak MT u dewiong bala deo shim jingkhein
Shillong, Nohprah 11 : Ka Iingkashari Meghalaya High Court ha ka sngi Nyngkong kala hukum ban die lilam noh ia u dewiong bala dep shim jingkhein, uba long haduh 5.50 lak metric ton hashuwa ban kut une u bnai ba mynta.
Ha ka hukum, ka Iingkashari ba kynthup ia u Chief Justice (Acting) HS Thangkhiew bad Justice W Diengdoh kala ong “La dep ai jingtip ba u dewiong bala dep shim jingkhein ba 5,50,000 MT u dang sahteng ban shalan bad lilan da ka Coal India bad kane kat kum ka jingbthah ka Single Member Committee u Justice Katakey, dei ban pyndep noh ia kane ka kam hapoh u Nohprah 2023. La khmih lynti ba kin bud ia kane ka jingbuhpor bad ban lilan noh ia baroh u dewiong bala dep shim jingkhein hapoh une u bnai”.
U Superintendent of Police (SP) ka East Khasi Hills, uba la wan mih hajir dalade hynne ka sngi, ula pyntip ba ka Ophis kala shim ia bun ki sienjam ban leh eiei halor ka kam bad la kurup ruh ia u dewiong bala kdew ha ki jaka kumba ka pynpaw ha ka 18th Interim Report ba 4800 MT.
U Advocate General ula pyntip ruh ba baroh ki kam ba iadei bad kane ka jingbishar kumba la kdew ha ka 18 interim report ka dang sah bad u Justice Katakey, u ban dang file ia ka kaiphod kaba bud.
Ka Iingkashari ka pynpaw ba khlem ka kaiphod ba khatduh, yn ym lah ban pynmih ia kano kano ka hukum ha kane ka por. Kumta kala bthah ban buh ia kane ka kam ha kaban bishar biang ha ka 19 tarik Nohprah, ban ap ia ka kaiphod u Justice Katakey halor ka kaiphod kaba la pan na u Deputy Commissioner bad kiwei ki bor khmih haba iadei bad u dewiong bala kdew ha ka 18 interim report.
Haba pynkut ia ka jingbishar hynne, u Court Master ula pyntip ba ka Iingkashari kala ioh pdiang ia ka 19 interim report na u Justice Katakey.
Pule lang ia kane: ‘Wat leh Politics’ : Ong u DyCM ia ka VPP halor ka kam them Metor
