Shillong, Feb 11: Ka sorkar Meghalaya hynne ka sngi baar kala iohpdiang ia ka shithi na ka Indian Olympic Association (IOA), laba la pynthikna ia ka jylla ban pynlong ia ka 39th National Games, kaban long ha u bnai Rymphang bad Lber 2027.
Ia katei ka shithi kaba la soi da ka President ka IOA ka Dr. PT Usha, kala phah sha u Myntri Rangbah ka jylla u Conrad K Sangma, da kaba ai jingithuh ia ka jingskhem jingmut ka sorkar ban kyntiew ia ki kam ialehkai bad ia ka jinglah ban pynlong ia ki jingialehkai kiba bunjait ha katei ka kyrdan.
“Ka jingshim tai ban bhah ia ka hok sha ka jylla Meghalaya ban pynlong ia katei ka lympung kadei ka jingithuh ia ka jingtrei shitom jong ka jylla ban kyntiew ia ka jingialehkai bad ka jinglah ban pynlong ia ki lympung iakob kum ka National Games,” la pynpaw ha ka shithi.
Ka National Games kadei ka rynsan kaba pyni ia ka sap ka phong jong ki nongialehkai kiba na kylleng jong ka ri India bad ka kyntiew ruh ha kaban pynbiang ia ki jinngdonkam bad ki jingtei bapher bad ka pynkhlain ia ka kolshor ha ka kam ialehkai. Kala pynpaw ruh ia ka jingshaniah skhem ha ka jylla Meghalaya ba kan pynlong ia kane ka lympung kaba jop bad kaban sah jingkynmaw bad IOA kala kular ban ai ka jingkyrshan kaba pura ban pynlong ia kane ka jingiakob kaba iaid beit iaid ryntih.
Nalor kane, ka IOA kala iawer ruh ia u Myntri Rangbah Conrad Sangma ban wan iashimbynta ha ka jingpynhap pyrda ia ka 38th National Games ha Haldwani, Uttarakhand, ha kaba kan don ruh ka jingaiti ia ka hok ban pynlong ia katei ka lympung iakob ialehkai.
“Kan long ka khyllipmat kaba kyrpang kum ka dak jong ka jingsdang jong ka jylla Meghalaya ban pynkhreh ia katei ka lympung ialehkai” la pynpaw ha ka shithi.
Hynrei kam shym la don pat kano kano ka jingpynthikna kaba pura hynrei la khmih lynti ba ka nongbah Shillong kan long ka jaka kaban lah ban pynlong ia ki jingiakob ki bapher da ka jingkyntiew kyrdan ia ka Jawaharlal Nehru Stadium.
Nalor kane, kiwei pat ki jaka kiba kynthup ia ka P.A. Sangma Stadium ha Tura bad ka Wahiajer Sports Stadium ha Jowai kidei kiba la khmih lynti ban lah ban pynlong ia ki jingialehkai kiba kongsan.
, laba la pynthikna ia ka jylla ban pynlong ia ka 39th National Games, kaban long ha u bnai Rymphang bad Lber 2027.){kind=link}