Shillong, Lber 26: U Myntri ka Food Civil Supplies & Consumer Affairs Bah Methodius Dkhar ula pynthikna ba kam don satia kano kano ka jingduna jongka umphniang Petrol ne Diesel ha Meghalaya, watla ka don ka jingbym long thikna ha ka pyrthei baroh kawei.
Haba iakren bad ki nongthoh khubor hynne ka sngi Palei, u Bah Methodius Dkhar ula ong, “Watla ka jinglong jingman ha ka pyrthei baroh kawei kala don ka jingartatien ba ka lah ban don ka jingduna jong ka jingshalan hynrei kane kadei ka bym pat thikna satia. Kumba long mynta hi ha Meghalaya, ngim don ia ka jingduna jongka Petrol bad Diesel.”
U Bah Dkhar ula pynpaw ba kane ka jingmutdur lypa ban don ka jingduna kadei namar ka jingmih ka thma ha ka pyrthei bad ula banjur ba ka jinglong jingman kadei kaba la peitbniah bha.
“Lada ka thma ka dang iai bteng sa katto katne por, ka lah ban poi sha uta u pud bad kane kadei ka ngi ia phaikhmat. Hynrei ia mynta hi kam don satia kano kano ka jingduna” ula ong.
U Myntri ula ong ruh, ba ka sorkar kam pat ioh pdiang ia kano kano ka kaiphod ban don ka jingduna ne jingpyndonkam palat na ki bor pyniaid district.
“Ki DC bad ki bor district ki dang khmih bniah ia ka jinglong jingman bad ngi lah dep bthah ia ki nongkhaii ba kim dei ban leh ia kino kino ki kam kaba lah ban lam sha ka jingduna ne ka jingpyndonkam kaba palat pud” ula bynrap.
Haba kylli la ka don kano kano ka jingthmu ban pyndonkam ia ka Odd-Even Formula, u Bah Dkhar ula ong, “Ia mynta hi, kam pat poi shaduh utei u pud, ngin sa peit kaei ka Formula ne ka buit kaba biang tam kaba ngin sa leh nangne shakhmat ban pynsuk ia ka jinglong jingman bad ban pynthikna ba ki paitbah kin ym mad jingeh”.
