Shillong, Risaw 20 : U Myntri ka Tnad Food & Civil Supply ka Jylla Bah Comingone Ymbon ha ka sngi Thohdieng, ula pynpaw ba u pdiang ia ka rai ban wanrah ia ka lynti rel ha Ri-lum Jaintia namar kan wanrah ia shibun ki jingmyntoi ia ki paidbah jong ka thain.
Haba iakren bad ki nongthoh khubor, u Bah Ymbon ula ong “Nga pdiang iaka jingwan ka rel. Nga la iohi ia ki Ri kiba don ka rel, ki paidbah kila ioh jingmyntoi shikatdei eh na ka” ong u Bah Ymbon uba dei ruh u MLA ka NPP na Raliang Constituency, West Jaintia Hills.
Ula ong “Dang shen, nga la leit sha Ri-lum Garo ban pynher ia ka lama rakhe Independence Day. Hadien ba dep pynher ia ka lama lai rong ka Ri, nga la leit jngoh ia ka Railway Station ha Mendipathar bad nga la iohi ia ki paidbah ka thain, kila ioh ia shibun ki jingiohnong”.
“ Lada phi leit na Mendipathar sha Guwahati, ki nongkamai kali ki ju pan haduh T. 280 shikhlieh hynrei da ka rel ka long tang T. 30. Kin mih na Mendipathar ha ka por 7 baje mynstep bad kin wanphai biang ha ka por 7 baje janmiet. Ki Nongrep kila ia kit ia arkriah laikriah ki mar rep kynthup ki soh ba ki pynmih ban die sha Guwahati bad kila iohnong bha. Wat ki marbam ruh, nga la kylli ha kito ki bnai Nailar na ki dukan ba ka dor jong u khaw ha Resubelpara ka long T. 31 katba hangne ha Shillong kala kot T. 44- Katno shuh kala iapher”.
U Myntri ula ong ba lada ka lynti rel ka wan, ki paidbah ka Ri-lum Jaintia ruh kin iohnong bha. “Ngi don ruh shibun bah ki marpoh khyndew kum u mawshun, u dewiong, ia ki ba ngi la pynkit da ki trok kaba shongdor haduh T. 2000 shiton, Nga tharai lada ngi pynkit da ka lynti rel, kan sa long T, 500 shiton bad T. 1500 kan rung noh sha pla” ula bynrap.
Haba kyntait ban kynthoh ia ka jingiai bteng ka jingpyrshah jong ki Sengbhalang ban wanrah lynti rel, u Bah Ymbon ula ong ba dei namar ka jingsheptieng ia ka jingrung kyrthep ki mynder, ka Sorkar kala dep ban mynjur ia ka Official Resolution ba kyrpad ia ka Sorkar Pdeng ban pyntreikam noh ia ka Inner Line Permit (ILP) hapoh Meghalaya.
“Mynta, ka rai ka shong ha ka Sorkar Pdeng. Ai ba ka Sorkar Pdeng kan mynjur ia kane” ula ong.
Ka Sorkar Jylla dang shen kala rai ban wad ia ki lad ki lynti kiba lah ban pynurlong ia ka jingwanrah lynti rel ha East Jaintia Hills District.
Pule lang ia kane: Pyni ka IAF ia ki buit bad ki sap pynher liengsuin iapom ha Pung Umiam
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
