Shillong, Nailar 26 : Ka Kynhun Myntri ka Sorkar Jylla, kala pdiang ia ka kaiphod jong ka Meghalaya Public Service Commission Reforms Committee (MPSCRC), kaba thmu ban pynjanai ia ka rukom treikam, ka jingmih, ka jinglong khuid suba bad ba shai ha ka rukom pyniaid ia ka eksam thungkam ha ka Meghalaya Public Service Commission (MPSC).
Ia kane ka kaiphod la aiti da ka Committee kaba la khlieh da u Principal Secretary Bah FR Kharkongor.
“Ka Committee kala aiti ia ka kaiphod jong ka bad ngi la pdiang ia kane ka kaiphod kumba ka long ha ka jingialang jong ka Kynhun Myntri ba long mynta ka sngi” ong u Myntri Rangbah Conrad K Sangma haba iakren bad ki nongthoh khubor hadien ba pyniaid ia ka jingialang ha ka sngi Ba-ar.
U Conrad ula pyntip ba ka Kynhun Myntri kala ai jingmut ban pyndait ia ki kor CCTV bad ki kor ban record ia ki jingleh interview khnang ban pynthikna ia ka jingkhuid jingsuba bad kaba shai.
“Nalor kane (ki jingai jingmut ka Committee), ka Kynhun Myntri kala ai jingmut ruh ba ka dei ban don ki kor CCTV bad ki kor recording ha ka por ba leh interview bad ki camera ki dei ban don khnang ba lada mih kino kino ki jingkylli ne ki kynrum kynram, yn lah ban khmih ia ki” ula ong haba kular ba ia kane ka kaiphod yn sa pyllait paidbah shen ban pynthikna ia ka jingtreikam kaba shai bad ba khuid ba suba ha ka rukom pyniaid ia ki eksam thungkam.
Haba kren halor ki jingpynkylla ba kongsan, u Conrad ula ong ba ki don ki lynti kiba shipor, kiba katto katne snem bad kiba neh slem bala ai jingmut da ka Committee.
Ka lynti kaba shipor ka kynthup ia ki lad ban bun bun tylli ki boards ban pynkloi ia ka jingshim interview, ban buh ia ki interview protocols, pynbna ia ki jingdon jingem bad ki ram ki shah da u Chairman bad ki dkhot, ban thaw ia ka grievance cell, ban pyni paidbah ia ki marks ba ioh da ki kyrtong ba iakhun eksam, ban pyllait ia ki answer key hadien ka eksam bad kiwei kiwei.
Haba iadei bad ki lynti kiba katto katne snem bad ba neh slem, u Myntri Rangbah ula ong ba ka Committee kala ai jingmut ban leh da ki test lyngba ki computer, ban pynkhlain ia ka MSC cell ha Jowai bad Tura, ban pynlong ia ka Combined Competitive Exam bad ban pynsangeh noh ia ka Optional paper.
“Haba iadei bad ki Optional paper, ngi lah dep leh teng ha ka eksam ba dang shu dep jong ka Meghalaya Civil Service (MCS) bad ngin sa leh kumjuh na ka bynta kiwei kiwei ki eksam ha ki sngi ban nang wan” ula pynbna.
, kaba thmu ban pynjanai ia ka rukom treikam, ka jingmih, ka jinglong khuid suba bad ba shai ha ka rukom pyniaid ia ka eksam thungkam ha ka Meghalaya Public Service Commission (MPSC).){kind=link}