Nongpoh, Risaw 3: Ki kynhun bapher bapher ka Ri-Bhoi District, hynne ka sngi Ba-ar, kila pdiang burom ia u samla Lionel Daryl Rymmei uba dei na Umroi, halor ka jingioh ia ka nam best Goalkeeper ne nongap kol ba kynsai tam ha ka lympung ialehkai SAFF U-19 Championship ba long ha Nepal.
U samla Lionel Daryl Rymmei u dei u nongap kol jong ka kynhun ialehkai ka India kaba la jop ia ka phainal bad long ka lah duh jong ka lympung da kaba pynliem ia ka Pakistan da 3-0 kol.
Ki kynhun bapher bapher ba kynthup ia ka FKJGP-NKHD kala pdiang burom ia une u rang ap kol ka India ha Jorabat ha ka jingwan phai noh shala iing.
Hadien kane sa ka kynhun Ribhoi District Sports Association ha ryngkat ka CoRP bad ka kynhun Young Mind ki la pdiang bad pynkup burom ïa une u samla ha phyllaw jong ka Ophis RBDSA.
