Nongpoh, Risaw 06: Ka Khasi Student Union (KSU) North Khasi Hills District hynne ka sngi palei, ka la pynkup burom ia une u samla Daniel Damlong u ba la khur takma ksiar na ka lympung ialehkai kaba la tip kum ka National MMA Championship 2022 ba la pynlong da ka All India Mixed Martial Arts Association ha Hyderabad, Telangana.
U samla Daniel Damlong u la ioh khur ia ka takma ksiar ha ka kyrdan Light Heavy Weight Division hadien ba u la lah ban pynliem ïa u Vikas Yadav na Orissa.
Ka KSU-NKH ka la pynkup burom ia u samla Daniel Damlong ha ryngkat u Bah Cores Marwein, u Coach ka Ground & Pound Gyms Nongpoh ha NSCA Indoor Stadium Nongpoh.
Na ka liang ka KSU la lamkhmat da u Bah Lambok Rymbai, Vice President ka North Khasi Hills, Bah John Lyngdoh President ka Nongpoh, Circle, u Bah Iabhalang Nongrum President ka Nongpoh Town Unit bad kiwei kiwei ki dkhot.
Haba kren ha kane ka sngi, u Bah Lambok Rymbai u la pynpaw ia ka jingkmen kaba khraw ban sakhi ba ka them Ri Bhoi District ka la nang lah ban pynmih ia ki rang bad thei ia kura kiba kynsai bad kiba la lah ban wanrah ruh ia ka nam ka burom ym tang ia ka district hynrei ia ka jylla Meghalaya hi baroh kawei na ki rynsan ialehkai sport bapher bapher.
U la ai ruh ka jingkitbok kitrwiang ia u samla Damlong kumjuh ia u Coach ka Ground & Pound Gyms ba kin nang iai kiew ha ki kam ialehkai Mixed Martial Arts bad ruh ban nang lah ban wanrah shuh shuh ia ka nam ka burom ia ka jylla.
