Shillong, Naiwieng 21 : U Myntri ka Tnad PHE Marcuise N Marak ha ka sngi Thohdieng, ula kam ba ki jingkylla kila paw ha ka jingroi ki jingtei ha Meghalaya bad kumjuh ruh ka jingkiew ha ka jingdon ka pla pisa ba 11% hapoh ka jingialam u Myntri Rangbah ka Jylla Conrad K Sangma.
Haba kren ha ka jingplie ia ka Ophis Building ka Williamnagar Municipal Board (WMB) bad ka Iew die doh ha Williamnagar, u Marcuise ula ong “Ka Meghalaya kala iohi ia ki jingkylla kiba paw haba phai sha ka jingroi ki jingtei hapoh ka jingialam u Myntri Rangbah, Conrad K Sangma bad ka Jylla kala sakhi ruh ia ka jingkiew ba 11% haba phai sha ka jingdon pisa”.
Ula ai ka jingiaroh ia u Chief Executive Officer ka WMB Ripamchi N Sangma bad u Chairman Benedick K Sangma halor ka bynta ba kila shim ha kaban tei ia ka Iew, ka ban ailad ia ki nongshong dukan ban die ia ki mar ki mata ha ryngkat ka khuid ka suba bad ka burom.
Ula pynbna ruh ia ka jingthmu ban tei ia ka Iew jhur ha Williamnagar ban kyrshan ia ki nongrep ka thain.
U Deputy Commissioner RP Marak ula ban jur ia ka jingkongsan ban die jingdie ha ki jaka bala buh haba pynkynmaw ia ki nongshong dukan madan baka jingdei doh bad dohkha harud surok ka dei kaba la khang da ka Iingkashari High Court.
Ula pynpaw ba ka Williamnahar lada iaid kat kum ka master plan, kan dei ka jaka ka ban kiew sted bha.
Na ka liang u Superintendent of Police Bah Stephen Rynjah ula kyntu ia ki nongshongdukan madan ba kin lehkhuid bad wan shakhmat ban pan jingiarap pyrshah ia ki riew runar.
