Shillong, Lber 02 : Ka People’s Democratic Front (PDF) kala pynpaw ba kam pat shim rai satia badno ba ka kwah ban iatreilang ha kaban thaw ia ka Sorkar thymmai hapoh ka Jylla.
U Working President ka PDF Bah Banteidor Lyngdoh, uba la jop biang ha ka sien ba-ar na Mawkynrew constituency, ula iathuh ha ki lad pathai khubor ba ka party kan ap bad sa shim rai shen halor kane ka kam.
Ka PDF kala jop tang ar seat ha kane ka elekshon sha ka Iingdorbar Thaw Ain ka Jylla.
U Bah Banteidor ula ong ba ka party jong u kala leh bha wat hapdeng ka jingphet noh ki arngut ki MLA-Bah Hamletson Dohling bad Bah Jason S Mawlong ban iasoh sha kiwei pat ki seng sain pyrthei.
“Ngi dang lah ban pynneh ia ar seat kynthup ka Sohra, kaba la mihkhmat da u Bah Gavin Miguel Mylliem” ula ong.
Lah ban kdew hangne ba ka PDF kala pynieng tang 8 ngut ki kyrtong.
