Shillong, Nailur 27: U Myntri Rangbah Conrad K Sangma hynnin ka sngi Nyngkong ula ong ba kam pat don satia kano kano ka jingpyntip na ka BJP ba kin weng noh na ka sorkar synrop jong ka Meghalaya Democratic Alliance.
“Kam pat don satia kano kano ka jingpyntip bad kam dei ruh ban poi sha nga namar kadei hapoh ka seng BJP hi, kumta ka jingkylli kadei sha ki,” u ong haba kren bad ki nongthoh khubor.
U Myntri Rangbah u kyntait ruh ban kren ei ei halor ka jingkren jong u nongialam ka Rashtriya Swayamsevak Sangh (RSS) u Dr Mohan Madhukarrao Bhagwat ba baroh ki briew kiba sah ha India ki dei ki Hindu haba iadei bad ka tynrai jong ki.
Da kaba pynpaw ba um iahap ia katei ka jingkren u Myntri Rangbah u ong, “Ka India kadei ka ri ba mane blei laitluid bad kumta kum ka ri ba laitluid ki don ia ka hok iano ka niam ban bud kat kum ka jingsngewbit.” U ong ba kitei kidei ki jingkren jong u heh RSS bad u don ka hok ban kren kat kum ka jingsngew jong u bad katkum ka jingiohi jong u kum u heh katei ka kynhun.
“Ngam don ei ei shuh ban ong halor ka jingiohi jong u shimet hynrei nga ong pat ba kum ka ri ngi don ha ka ri kaba don ka jinglaitluid ban mane Blei.”
