Nongstoin,Naiwieng 12: Ka skul Sib Singh Memorial Government Higher Secondary School, kat haduh mynta kam shym la ioh satia ban shimti ia ka Iingskul ba thymmai (new school building) bala plie paidbah da u Myntri Rangbah ka Jylla Conrad K Sangma, kaba la jan kot ia ka shisnem pura.
“Haduh mynta ngim pat ioh satia ban pyndonkam ia kane ka Iingskul ba thymmai. Ka daw hi ka dei namar ba u contractor um pat aiti sha ka skul wat tang ia u shabi ruh” ong ka Principal jong ka skul kong D Hoojon haba iakren bad Ka Shlem.
Haba kylli, kane ka Principal kala pynpaw ruh ia ka jingbym don jingtip satia ia ki daw balei ba u Contractor ym pat aiti ia kane ka Iingskul sha ka skul.
Ha ka jingjurip Ka Shlem, la lap ba ki kam kiba dang sah ha kane ka Iingskul ba thymmai ka dei ka jingring ia ka bording elektrik ban ai jingshai, ka um bad ki katto katne ki jingdonkam barit baria.
Kumba long mynta, ki khynnah jong kane ka skul ki dang hap ban shong klas ha ka Iingskul kaba rim watla kane ka iingskul kam ilong shuh ban pyndonkam.
Kumban shu pynkynmaw hangne, ka skul Sib Singh kaba don ha Nongpyndeng Nongstoiñ West Khasi Hills District, kala kynjoh ia ka 46 snem ha ka jingshakri ia ka dong ka thain ban pynphriang ia ka jingnang jingstad naduh bala seng ia ka ha u snem 1976.
Dei ha u snem 2023 ba kane ka skul kala ioh ban pynieng thymmai ia ka Iingskul ha ka jinglut jingsep ba kot ia ka T. 4 klur tam.
Ïa katei ka iingskul thymmai la plie paidbah ha ka 17 tarik u Kyllalyngkot 2023 da u Conrad K.Sangma, Myntri Rangbah ka jylla Meghalaya.
