Shillong, Jylliew 12 : Ka Sorkar Jylla kala kyrpad ia ka Sorkar Pdeng ban iarap song pisa na ka bynta ban pyndep noh ia ki jingtei ba dang sah jong ka Shillong Medical College hashuwa ban sdang ka jingpynrung klas ia ki khynnah thymmai ha u snem pule ban wan.
U Myntri ka Koit ka Khiah Bah Wailadmiki Shylla ula pyntip ba ia kane ka kam la pynsngew ruh hakhmat u Myntri ka Sorkar Pdeng ba khmih ia ka tnad ka Koit ka Khiah bad ki dkhot ka Parliamentary Standing Committee on Health ha ka jingwan jong ki dang shen ha Jylla.
“Ngi la shim ia ka kabu ban pyntip sha ki (Myntri ka Sorkar Pdeng bad ki Dkhot ka Parliamentary Committee on Health), khamtam haba iadei bad ka jingplie ia ka Shillong Medical College” ula ong.
U Bah Wailad ula kdew ba ka College, kaba dei ka college ba pyndonkam na ki jingtei bala don lypa (brownfield project) ka dang duna ia shibun ki jingdonkam kiba hap ban leh khnang ba kan treikam pura.
“Ka Shillong Medical College ka dei ka brownfield project bad shibun ki kam ki dang sah. Naduh u snem ban wan, ki khynnah thymmai kin wan, kumta ki jingtei kum ka Adminsitrative Block, Hostel bad Laboratories ki dang donkam ban hap pyntrei” ula kdew.
U Myntri ula kyrpad ia ka Ministry ka Sorkar Pdeng ban iarap song pisa khnang ban lah pyntrei noh ia ki jingtei khlem ka jingpynslem shuh.
