Shillong, Iaiong 27 : Ka Sorkar Pdeng kala pan por ban jubab ia ka hukum ka Iingkashari Meghalaya High Court ban phah ia 10 pyrton ki kynhun Central Armed Police Force (CAPF) ha kaban tehlakam ia ka jingkhaii tuh ia u dewiong bala tih be-ain hapoh ka Jylla.
Haba shong bishar ia ka PIL halor kane ka kam hynne ka sngi Palei, ka Iingkashari Full Bench bala khlieh da u Chief Justice Sanjib Banerjee kala ong “Ka Sorkar Pdeng kala pan por. Ai ba kane ka mukotduma kan wan phai hadien artaiew”.
Ha ka hukum bala pynmih ha ka 12 tarik Iaiong, ka Iingkashari kala ong “….bad ka Ministry of Home lyngba u Secretary ka Ministry, la bthah ban pynthikna ia ka jingphah ia 10 pyrton ki Central Armed Police Force ki ban pyniaid laitluid dalade lane ryngkat bad ki Ophisar na ka Tnad Pulit kiban sa jied da ka Iingkashari, thik tang na ka bynta ban peitngor ha ki surok bad tehlakam ia ka jingkhaii tuh ia u dewiong bala tih beain hapoh ka Jylla”.
Ka Iingkashari kala bthah ruh ia ka Sorkar Pdeng ban jubab halor kane lyngba u Secretary.
Ha kajuh ka por, ka Iingkashari kala bthah “Ia kaba mynta, namar ka jingsiew duna ia ka jingsiew adhoc sha u Justice Katakey, dei ban siew noh mardor ia ka song pisa ba T. 3 lak, nalor sha ki jingpynlut jingsep kaba long kat kum ka jingbthah bala pynmih kham hashuwa”.
Ka Iingkashari kala buh ban bishar biang ia ka kam ha ka 15 tarik Jymmang, 2023.
Pule lang ia kane: Pyrshah ki nongshong shnong khappud ka Arunachal ia ka jingiateh kam khappud bad ka Assam
