Shillong, Rymphang 25: U Nongialam ba rangbah ka BJP bad u National Secretary barim u Sunil Deodhar ula phah da ka jingthoh ban pynpaw ia ka jingsngewsih halor ka jingai jingkren ha ka Indigenous Faith Conference kaba la long ha Pynter, Pynursla (East Khasi Hills), hadien ba ka seng kala pan ia ka jingpynshai na u.
Ha ka shithi kaba la phah sha u General Secretary ka BJP Meghalaya u Bah Wankitbok Pohshna, u Snil Deodhar ula banjur ba u burom bha ia u Trai Jisu Khrist bad u don ia ka jingieid ia ki riewngeit Khristan”.
Ula thoh “Kam dei satia ka jingthmu ka jong nga ban pynsngewsih ia kino kino ki para ne hynmen kynthei bad shynrang Khristan. Lada ki don kino kino ki kyntien kidei kiba la shim ba ym shim la burom ne kala wanrah ia ka jingpang, nga da sngewsih shisha”
U Deodhar ula batai ba ka jingkren ka jongu ha ka jingialang kadei kaba la pynleit jingmut halor kiba dang bat ia la ka Niam Tynrai bad kadei da ka jingthmu ban shimkhia ban pynneh pynsah, ban iada bad ban kyntiew ia ki jingsngewkhia jong ki riewngeit kiba bat ia ka Niam Tynrai ym ban kynthoh salonsar ia ki Khristan baroh.
Ula kdew ruh ba la 20 snem ula trei ha ka kynhun ka jongu “My Home India”, bad ka pynpaw ba la ai jingiarap ia hajar ngut ki samla Khristan na ka thain shatei lam mihngi.
“Lyngba katei kajuh ka kynhun, ngi ju pynlong man la ka por ia ka jingrakhe lypa ia ka Khristmas na ka bynta ki samla Khristan kiba sah jngai na la ki bahaiing bahasem ha kylleng ka ri India,” ula thoh bad ka pynpaw ba ula pynlong ruh iaka jingrakhe ha ka iingsah jong u Deputy Prime Minister barim ka ri u L.K. Advani.
U Deodhar ula pynapw ba ka jingkyrshan ia ki riewngeit kiba dang bat ia ka Niam Tynrai kum ka Niam Khasi bad Niam Tre kam dei ban don pat ka jingbym sngewtynnad ia kiwei pat ki niam. “Ban pynsaphriang ia ka hok bad ka jingioh kaba mar kumjuh ia baroh ki riewngeit kam dei satia ka jingisih ia kiwei pat. Ka jingkhlain ka ri India ka shong ha ka jingburom mar kylliang bad ka pateng jong ka jingimlang da ka jingsuk” ula ong bad ka pynpaw ia ka thong jong ka sorkar ka ‘Sabka Saath, Sabka Vikas, Sabka Vishwas, Sabka Prayas’.
Ula pynkut da kaba pynpaw ia ka jingsngewsih ia kano kano ka jingpynmong kaba khlem da thmu bad iengskhem ha ka jingkular ban don ka jingieid, ka jingjingkynthup lang bad ka hok ia baroh ki niam”.
, hadien ba ka seng kala pan ia ka jingpynshai na u.){kind=link}