Shillong, Jylliew 11 : Ki Pulit ka Jylla kila pan ban tohkit 10 sngi ia ka Sonam Raghuvanshi bad ia ki 4 ngut ki runar, kiba la ialam tian bishar hynne ka sngi ha ka Iingkashari Chief Judicial Magistrate (CJM) ha ka sngi Balang, namar ka jingdonkti ban pyniap ia u Raja Raghuvanshi, u nong Indore uba shah pyniap ha ka jingwan leh honeymoon ha Sohra.
“Ka jingtohkit kan sa sdang shen mar syn ioh ia ka por ban pynlong ia ka jingtohkit. Ngi la pan 10 sngi ban set ha ka police custody bad lada donkam bun, ngin sa nang buh ia ka jingkyrpad ban aipor” ong u Superintendent of Police ka East Khasi Hills Bah Vivek Syiem haba iakren bad ki nongthoh khubor.
Haba kyntu ia ka jingdonkam ban kiar na ka jingpynman lai phew jait, u Bah Vivek ula ong “Ngim pat ioh satia ia ka por ba ngi la pan. Ki don shibun kiei kiei. Ka jingtohkit ba dang leh malu mala bad ka jingtohkit ka dei kaba la leh ha kito ki Jylla, ki lah ban phla ia kaei kaei hynrei ia kine ki kam, donkam ban hap pynthikna bad pyniahap bala kyrshan da ki sabut”.
Haba kylli, u SP ula ong ba ia mynta, ki Pulit ki dang kem tang 5 ngut kiba donkti ha kane ka jingpyniap ia u Raja.
“Katba ka jingtohkit ka dang iaid, ngin sa nang lah ban pynthikna la ki dei tang kine ki briew ba donkti lane ki don kiwei ruh kiba donkti lang” ula bynrap.
Halor ka jingpynwandur biang ia kaei kaba la jia, u SP ula ong ba ia kine ki 5 ngut yn nym ialam satia lashai ka sngi sa Sohra namar ki dang hap ban bishar ban tohkit shuwa.
“Pat dei lashai. Ngi hap ban tohkit shuwa ia ki. Hadien ba ngi la dep tohkit, la dep buh jingthoh ia ki jingbatai jong ki, ynda ngi la ioh ia ki jingshisha baroh halor kane ka kam, ka SIT kan sa shim rai ia ka sngi ba lano kin leit hiar sha Sohra ban phah batai ia kiei kiei baroh kiba la jia” ula ong.
Nalor kane, u Bah Vivek ula iathuh ba ka medical report jong ka Sonam kala pyni ba kam pat armet satia.
“Hynnin ka sngi, ngi la rah ban leh check up ba bniah bha ia ka Sonam ha Ganesh Das Hospital bad baroh ki test ki pyni ba kam pat armet satia. Kin sa leh test biang ia ka hadien 24 kynta” ula ong haba bynrap “Ki don shibun ki khana pynman hi ba ong ba ka Sonam ka armet. Ngi donkam ban shim ia ki lad jingiada bad jingshngain haba ngi shimti ban set ia ka namar ka koit ka khiah ka dei kaba kongsan tam”.
Kat kum ka jingong u SP, ia ki 4 ngut ki runar ruh la dep ban khmih bniah da ki doktor ha Sadar Police Station. Ka jingkhmih ia ka koit ka khiah jong ki, ka dei kaba lah ban leh da kino kino ki doktor Sorkar.
Haba kylli, u Bah Vivek ula ong “Sngewbha aipor ia ngi bad hadien ka jingtohkit ngin sa lah ban batai na kumno kane ka jingjia ka jia”.
Ha kajuh ka por, u Bah Vivek u iathuh ba ka jingtohkit ia ki 4 ngut ki runar ka dang shu sdang bad hadien bala tohkit ia ki, ki Pulit kin sa tip la ki dang donkti ne em ha kiwei kiwei ki kam bymman.
 ha ka sngi Balang, namar ka jingdonkti ban pyniap ia u Raja Raghuvanshi, u nong Indore uba shah pyniap ha ka jingwan leh honeymoon ha Sohra.){kind=link}