Shillong, Jymmang 15: U Symbud Myntri Rangbah ka Jylla ba khmih iaka Tnad Transport bah Sniawbhalang Dhar, hynne ka sngi Nyngkong, ula pan ia ka kaiphod halor ka jingshah kem jong u District Transport Officer (DTO) ka East Garo Hills ha ki Pulit Assam namar ka jingkynnoh ba u donkti ban pynshna thok ia ki kot ki sla jong ki kali tuh.
“Nga hap ban ai ia ka kaiphod (shuwa ban shim ia kano kano ka sienjam halor kane ka kam)” ong u Bah Sniawbhalang haba iakren bad ki nongthoh khubor.
Ula ong ba kam long satia kaba iahap ia u ban ong eiei la ia une u Ophisar un pynngat shuwa ha ka jingshah wengkam shipor (sospon).
“Ngan dang ban ioh ia ka jingtip kumno kane ka jingjia ka jia. Ai ba ngan ioh shuwa ia ki jingtip ia kaei kaba jia bad ngan sa pyntip sha phi” ong u Myntri.
Haba kylli, u Bah Sniawbhalang ula kubur baka long kaba donkam ban pynthikna ia ka jingtreikam kaba shai ha ki Ophis ka Tnad Transport hapoh ka Jylla bad ong “ Hooid, baroh ki jingtreikam ki dei ban long kaba shai bad lada don kano kano ka jingleh tam bad tang hadien ba ngi ioh ia ka jingujor, ngin sa lah ban leh eiei kat kum ka ain”.
Ha ka sngi U Blei, u DTO ka East Garo Hills Genekelly G Momin ula shah kem ha ki Pulit ka Assam halor ka jingdonkti ban pynshna thok ia ki kot ki sla jong ki kali ba shu tuh.
Ia une u DTO la kem da u Circle Inspector Siraj Ingti bad u Officer in Charge ka Agia Police Station Manimoy Tamuly, uba la ialam ia ka kynhun ki Pulit sha ka Ophis u DTO ha Williamnagar.
Kat kum ka jingong ki Pulit, u Genekelly ula iadonbynta lang ha ka jingpyniaid ia ka kam ban shna ia ki kot ki sla ba thok jong ki kali ba shu tuh, da kaba register thymmai naduh ki chesis number, engine number bad kiwei kiwei ki kot ki slab a donkam.
