Shillong, Rymphang 06: U Myntri ka Ministry for Coal and Mines G. Kishan Reddy ha ka sngi Palei ula kren shai ba ka jingiap briew ha ka jingbthei bomb ha ka par tih dewiong ha East Jaintia Hills, ka dei kaba jia ha ka jingtih par beain haba pyntip ba ka Sorkar India kam don par dewiong satia ba treikam ha Jylla.
Haba kynthoh ia ka jingjia bthei bomb ba shim ia ka jingim ki 18 ngut, u Myntri ula ong “Ka jingjia kala jia ha ka par ba tih dewiong beain ha Meghalaya.Bun ngut ki briew kila iap. Ka Sorkar India kam don par dewiong satia ha Meghalaya. Pat don kawei ka coal block ban lilam haduh mynta. Ym don satia ki par PSU ne ki commercial ba don hangtei”.
U Myntri ula ban jur ba kane ka jingjia ba sngewsih ka pyni ia ka jingdonkam ba kyrkieh ban tehlakam ia ki jingtih par beain, ia kaba u ong ba ka dang treikam wat hapdeng ki jingmaham ba man ka por.
“Ngi ju thoh na ka por sha ka por sha ka Sorkar Jylla ban khang ia ka jingtih dewiong beain. Watla katta, ki mafia ki pyniaid ia ki par dewiong ha kylleng ki jaka bad phah trei ia ki lui lui. Kane ka hap ban sangeh noh hapoh ka jingkhmih jong ka Sorkar Jylla. Kam dei ban don ka jingiapein. Kum kine ki jingjia kim dei ban jia…ka jingtih dewiong beain kam dei ban don” ula ong.
U Reddy ula pynthikna ba ula pan ia ka kaiphod kaba bniah na ka Sorkar Meghalaya halor kane ka jingjia bad kyntu ia baroh ki Jylla ba kin pyntrei pyrrkhing bha ia ki ain tih par ban nyn jia shuh kum kine ki jingjia bad ban duh ia ki mynsiem briew.
Kane ka jingbthei bomb kaba jia ha ka por 11 baje mynstep ha ka par dewiong ba khlem ioh jingbit ha EJH, kala shim haduh 18 ngut ki mynsiem bad uwei ula mynsaw ia uba la pynkit sha ki jaka sumar kiba paka.
Ha kajuh ka por, na ka liang u Myntri Kam Pohiing Amit Shah ula shong bishar ia ka jinglong jingman bad kular ia ka jingiarap ba pura ba ka Sorkar Pdeng. Kawei ka Kynhun NDRF kala poi sha Thangsku bad sa artylli ki Kynhun ki dang don ha lynti.
U Myntri Rangbah Duh ka Ri Narendra Modi ula pynbna ia ka song jingiarap ba T.2 lak sha ki bahaiing jong kiba iap bad T.50,000 sha kiba mynsaw na ka Prime Minister’s National Relief Fund.
Ka Sorkar Meghalaya kala pynbna ia ka song jingiarap ba T.3 lak sha ki bahaiing jong kiba iap.
Ki bor district kila register ia ka suo motu fir ha Khliehriat Police Station hapoh ki kyndon jong ka Bharatiya Nyaya Sanhita, the Mines and Minerals (Development and Regulation) Act, bad ka Explosives Substances Act.
