Shillong, Rymphang 01 : Ka Iingkashari Meghalaya High Court hynne ka sngi Balang, kala bthah ia u Chief Secretary ka Jylla ban file ia ka Action Taken Report (ATR) ne ka kaiphod aiu bala leh, pyrshah ia ki Ophisar ba donkti bad ban kurup ia ki Nongkynti jong ki halor ka jingailad ban treikam ki karkhana coke ba beain hapoh ka Jylla.
“U Chief Secretary u dei ban ai ia ka kaiphod ha ka sien shong bishar ba nyngkong jong ka IIngkasahri ha ka 3 tarik Rymphang 2023, ba batai ia kaei kaba ula leh pyrshah ia ki Ophisar ba donkti, kynthup ka jingai notice ban sospon, ban bishar da ka Tnad, ban kurup ia ki nongkynti halor ka jingailad ia ki karkhana coke ba beain ba kin treikam” ong ka Division Bench ha ka hukum bala pynmih halor ka PIL bala mudui da uwei u Monu Kuman.
“U Chief Secretary un wanrah ia ka kaiphod sha ka Iingkasahri bad un hap ban shim jingkitkhlieh ia kaei kano ka jingtih beain ia u dewiong lane jingtreikam beain kino kino ki karkhana coke ha ka Jylla. Kaba sah jong kane ka kam yn sa shong bishar hadien ka jingioh pdiang ia ka kaiphod na u Chief Secretary” ong ka Iingkashari.
Ha ka affidavit bala file ha ka 27 tarik Kyllalyngkot, u Deputy Commissioner ka West Khasi Hills, ula pyntip ba la dep wan tah ia ki notice khang khyrdep ha kawei pa kawei na ki 57 tylli ki karkhana coke bad la ujor ejahar ruh halor kane hapoh ka Shallang Police Station.
Hynrei ka Iingkashari kala ong “Ka Iingkashari kam lah ban pdiang ba ka Sorkar Jylla lane ki Heh Ophisar kin ym tip ia ka jingdon haduh 57 tylli ki karkhana coke kiba treikam sop sop ha ka por mynmiet tad haduh ba hap khang khyrdep da ka jingpyntreikam ia ka hukum jong kane ka Iingkashari hadien ba shong bishar ia ka Public Interest Litigation (PIL)”.
Haba pynpaw ba ka dei ka kamram jong ka Sorkar ban pynthikna ba kam dei ban don kano kano ka kam kaba donkam ia ka licence ba kan treikam khlem da ioh licence, ka Iingkashari kala ong “ Ka nongrim ba ka sorkar ka shim halor ka kam tih dewiong beain bad ka jingtreikam jong ki karkhana coke beain ka dei ka bym ai jinghun satia”.
“Ka dei ka kam kaba pynlehrain ba wat hapdeng ki hukum jong ka Iingkashari Supreme Court, khlem pep, jingtreikam ba kynrum kynram la wanrah da kane ka sorkar da kaba iaid lait ia kine ki hukum bad iarap pynban ia ka jingtih beain ia u dewiong bad ka jingtreikam jong ki karkhana cole ba khlem don licence ha ka Jylla. Ka jingtreikam pathar jong kine ki karkhana coke beain ka lam sha ka jingtih beain ba pathar ia u dewong ha ka Jylla watla ka Sorkar Jylla kala kular da khongpong” kala ong haba kdew ia ka mudui ba thymmai ba la ioh pdiang halor ka jingtih dewiong beain ha South Gro Hills.
U DC ha ka affidavit ula pyntip ruh ba haba pyntreikam ia ka jingbthah jong ka hukum ba 16 tarik Nohprah 2022, la pynmih ia ka hukum ban leh eiei mardor ha kaban khang ia ki baroh ki karkhana coke ba beain kiba treikam ha West Khasi Hills.
“Ha ka jingkhynra, la shem ba kine ki karkhana coke kila treikam ha ka por mynmiet ha ki jaka kyndong. Ia kine ki karkhana la dep ban khang dam bad la kurup ruh ia u dewiong bad ia u coke ba lap na kine ki karkhana” ong u DC.
Ka Iingkashari kala buh ban shong bishar biang ia kane ka kam ha ka 3 tarik u Rymphang.
