Shillong, Nohprah 13 : Ka Iingkashari Meghalaya High Court kala hukum ia ka Sorkar Jylla ban ai ia ka kaiphod halor ka jinglong jingman jong ka surok Jowai Bypass.
Haba shong bishar ia ka PIL hynne ka sngi ba-ar, ka Division Bench kala ong “Ka Jylla ka dei ban file ia ka kaiphod kat kum ka jinglong jingman ban pyni ia ka rukom long ka surok bad haduh katno ka jingsniew jong ka surok kaba donkam ban maramot da ka Tnad PWD (Road) ba kan maramot bad sumar ia ka. Buh ban bishar biang ia ka ha ka 3 tarik u Rymphang, 2023”.
Ka surok Jowai Bypass kala jot rathai bha bad ki kali kiba wan na shaphang ka Shillong bad ba leit sha ka thain Khliehriat ne palat, khamtam ki kali bha, ki pyndonkam ia ka bypass. Kumjuh ruh ki kali Shillong lane Guwahati kiba wan na ka thain Silchar kim donkam shuh ban ,leit sha Jowai da kaba pyndonkam ia ka bypass. Ka jingjot rathai jong kane ka bypass ka donkam ia kaban maramot noh mardor.
U Nongiasaid ain ka National Highway Authority of India (NHAI) ula pyntip ba ia mynta hi kam pat long shai la ka jingbah khlieh ban maramot ia ka bypass ka dei jong ka NHAI lane jong ka Tnad PWD (Roads) ka Jylla.
Hynrei ka Iingkashari kala banjur ba kane ka bypass kala donkam ban maramot noh ban ioh pyndonkam ia ka bad ong “La ka dei ka NHAI ne ka tnad PWD (Roads), ka tnad kaba dei peit ka dei ban leh eiei noh mardor khnang ba ka jingmaramot kan noh noh ha ki pdeng taiew jong u Kyllalyngkot 2023”.
Kala hukum ruh ba u nongmudui un phah ia ka copy jong kane ka hukum sha ka Tnad PWD (Roads) ba kan leh eiei mardor lada dei ka jingbahkhlieh jong ka tnad PWD (Roads) ia kane ka surok.
Shuwa kane, ka NHAI kala pyntip ia ka Iingkashari ba kala dep ban maramot ia bun bah ki bynta jong ka surok NH-6 hynrei ha ki katto katne ki jaka, ka jingmaramot ka dang iai bteng.
Kat kum ka jingong ka NHAI, ki bynta jong ka 102.255 km na Jowai sha Ratacherra yn sa maramot bad pynbha biang ia ka hashuwa ka 10 tarik u Kyllalyngkot 2023 lada slem eh.
Ka Iingkashari kala buh ban bishar biang ia kane ka kam ha ka 3 tarik u Rymphang.
