Shillong, Risaw 04: Ka University of Science and Technology, Meghalaya (USTM) kala kyrpad ia ka sorkar jylla ba kan ai ram ba T.233 Klur khlem ka jingshim sut na ka bynta ka PA Sangma International Medical College bad Hospital, kaba dei ka Medical College kaba nyngkong jongki riewshimet ha ka jylla.
Ia katei la iathuh da u Chancellor ka USTM u Mahbubul Hoque ha ba iakren bad ki nongthoh khubor ha kaba ula ong, “Ngi dang khmih lynti ban ioh (jingiarap pisa) T.233 Klur kum ka ram ka bym donkam ban siew ia ka sut. Kumta hapoh jong ka 20 snem, ngin sa pynphai noh ia katei ka pisa baroh (sha ka sorkar Meghalaya)”.
Ula ong, ba ka sorkar jylla kala mynjur ban ai jingiarap pisa ia ka Medical College kaba pyniaid da ki riewshimet, hynrei ka sorkar kan dang shong pyrkhat ban ai ia ka rai halor katei ka mat.
Ula ong ba ka National Medical Commission of India hapoh jongka Ministry of Health and Family Welfare kala ai ia ka jingmynjur ia ka Medical College bad Hospital ban sdang ia ka MBBS program na ka bynta ki 150 ngut ki samla pule naka bynta ka samoi pule 2024.
“Kane ka medical college kadei da ka jingiatreilang bad ka sorkar Meghalaya da ka jingiasngewthuh jingmut, wat la ngim pat iasoi ia ka MoU,” la ong u Hoque bad ka ai khublei ia ka sorkar Meghalaya bad iaki heh ophisar kiba la ai jingkyrshan ia ka skulbah.
Ula pyntip, “Nalor ka jingdon ia ki jaka ai jingsumar, yn ai jingsumar ei ia ki nongpang ka jylla Meghalaya kiba ioh jingsumar ha ka General Health Care treatment, ngin ai 40 tylli ki seat MBBS ia ka jylla Meghalaya, ia kaba 25 tylli ki Seat ngi tyrwa ban shu ai ei khlem kano kano ka jingsiew pisa”.
“Nuksa, ha ka Government college ka jingsiew ka long kaba duna bha, lehse ka lah ban long T.1 lak ne T.120000, ia katei ka dor la pdiang da ka sorkar Meghalaya, ngi ngin tyrwa ei naka bynta 25 tylli ki Seat. Katba kaba sah sa 15 tylli ki seat kan long noh mar shiteng naka jingsiew ha ka skulbah, kane ka so 25 bad sa ka 15 seat baroh kin long 40 seat,” ula bynrap.
Nalor kane, u Chancellor ula pynsngew ruh ia ka jingtyrwa jong ka skulbah ban buh ia ki tiar bad ia ki jingtei kiba thymmai.
“Ngin sa don iaka jaka pule kaba heh na ka bynta ka Super Special Facility, ha kaba baroh kiba iadei bad ki “Transplant” ne jingbujli naduh u Kidney, ka jingbujli ia ki dkhot met, Liver bad kiwei kiwei ki jingbujli kin sa sdang naduh u snem ban wan” ula ong.
U Chancellor ula pyntip ba ka skulbah kan sdang ruh ia ka jingpule Nursing mynta u snem.
“Ha ka Nursing Program, kumba 350 ngut ki Nurse kila wan ban rung, ha kaba kumba 275 ngut ki Nurse kidei tang naka jylla Meghalaya bad kila leh bha” ula bynrap.
 kala kyrpad ia ka sorkar jylla ba kan ai ram ba T.233 Klur khlem ka jingshim sut na ka bynta ka PA Sangma International Medical College bad Hospital, kaba dei ka Medical College kaba nyngkong jongki riewshimet ha ka jylla.){kind=link}