T.252 Klur ban siew tulop ia ki nongtrei GHADC
Shillong, Nailur 20: Ka Sorkar Meghalaya kala pan ia ka jingkyrshan pisa kaba kot T. 664.49 Klur na ka Sorkar Pdeng na ka bynta ka Garo Hills Autonomous District Council (GHADC) kaba don hapdeng ka jingkyrduh pisa, lyngba ka Agreed Text of Settlement ne ka jingiatehkular hapdeng ka Sorkar Pdeng, Sorkar Jylla bad ka kynhun kieng atiar kaba la khylliap lama noh ka Achik National Volunteers Council (ANVC) bad ANVC.B.
Na katei, la pan ruh ia ka T.252 Klur na ka bynta ban siew ia ka tulop jong ki nongtrei ka GHADC kaba la sahteng mynta la 43 bnai.
Ha ka shithi kaba la phah sha u Secretary, Ministry of Home Affairs (MHA), da u Commissioner & Secretary in-charge Planning, Investment Promotion and Sustainable Development Department u Dr Vijay Kumar D ula ong, “Ka GHADC kala buh ia ka jingdawa ia ka jingdonkam T.664,49,27,382 Klur na ka bynta ki kam bad ki jingdonkam jong ka Council, na ka bhah tyngka jong ka Additional Financing & Special Projects hapoh jong ka jingiateh kular hapdeng ka Sorkar Pdeng, Sorkar Meghalaya bad ka ANVC & ANVC-B. Nga kyntu ia phi ba phin sngewbha ban shimkhia lang ia kane bad ban mynjur ban bhah ia katei ka pisa na ka bynta ka jingdonkam jong ka Council katkum ka Agreed Text of Settlement”.
Ula pyntip ba ka Ministry of Environment Forest and Climate Change ka lah dep ban mynjur ia ki projek jong ki kam kiba iadei bad ka tnad Forest hapoh ka jinglut jingsep kaba kot ia ka T. 308,14,27,382 Klur.
Ka DPR kaba iadei bad ka jingbuh ia ki Solar Street Lights, jingpynbha ia ki iew ki hat ha ki thain Nongkyndong, ka jingkyntiew ia ka jingrep ia ki soh ki pai bad ka jinglong kongsan jongki Processing Unitm, kadei kaba la phah ia ka jingtyrwa ban iarap pisa ha ka jinglut jingsep kaba kot T.104.34 Klur.
“Nalor kane, namar ka jinghiar kynsan ha ka jingioh lum ia ka khajna jong ka Council, kam shym la lah ban siew pyndep ia ka tulop jong ki nongtrei bad kumta ka Council kala pan ia ka jingiarap kaba tang shisien kum ka Grant kaba T. 252,01,00,000 Klur” la ong u Dr Kumar.
 kaba don hapdeng ka jingkyrduh pisa, lyngba ka Agreed Text of Settlement ne ka jingiatehkular hapdeng ka Sorkar Pdeng, Sorkar Jylla bad ka kynhun kieng atiar kaba la khylliap lama noh ka Achik National Volunteers Council (ANVC) bad ANVC.B.){kind=link}