Shillong, Iaiong 22 : Ka North Eastern Indira Gandhi Regional Institute of Health & Medical Sciences (NEIGRIHMS) kala pan ia ka bor pahara da ka Central Armed Police Force (CAPF) na Delhi hadien ka jingwan thombor ba dang shen jong ka seng Hynniewtrep Youth Council (HYC) halor ka jingdawa ban pyntreikam ia ka bhah 80:20 ha ka jingthungkam nos ia ki kynthei bad ki shynrang hapoh ka Institute.
Ha ka shithi sha u Joint Secretary (H-III) Ministry ka Health & Family Welfare ha ka sngi Ba-ar, u Deputy Director (Admin) ka NEIGRIHMS Pawan Deep ula ong “Ban pynkhlain ia ka jingshngain bad pynthikna ia ka jingtreikam ba iaid beit iaid ryntih jong ka Institute, la kyrpad kyrkieh ba, nalor ki lad pahara kiba la don mynta, donkam ban phah bun ki CAPF ki ban pahara ha ki jaka kiba kongsan hapoh ka Institute”.
“Ka jingbuh ia ki CAPF ban pahara kan iarap bha ha ka jingshngain, tehlakam ia ki jingma kiba lah ban wan hap hapoh ka Institute bad ban tehlakam ruh iakum kine ki jingjia. Haba buh hakhmat ia ka jinglong kyrkieh ka kam, ka jingmynjur ba mardor jong phi ban buh ia ki Pulit CAPF ban pahara ia ka Institute ka dei kaba la kyrpad jur bha” kala ong.
Ka NEIGRIHMS ha ka shithi sha ka Ministry ha ka 9 tarik Iaiong kala kren halor ka jingthungkam ia ki nursing officer ha NEIGRIHMS ba iadei bad ka jingai bhah ba 80:20 (shynrang bad Kynthei).
Ha ka shithi, la pyntip ba ka Institute kala ioh pdiang ia ki jingud jingnam na ki artylli ki kynhun Sengbhalang bala tip ka Hynniewtrep Youth Council (HYC) bad ka Khasi Students Union (KSU).
Ka HYC kala aiti ia ka dorkhas jong ka, ba pyrshah ia ka jingpynbna laitkam jong ka Institute ba 22 tarik Kyllalyngkot 2025 lyngba ka shithi ba 24 tarik Lber, 2025.
Ka HYC kala aipor 7 sngi ia ka Institute hynrei namar ki jingbunkam ia ka kut snem mang tyngka, ki shuti bad ka jingdonkam ban pynbit pynbiang ia ki jingtip halor ki kot ki sla ban kyrshan, ia ka jubab la pynkhreh bad ai jingmynjur tad haduh ka 4 tarik Iaiong, 2025. Ia ka jubab la phah sha ka HYC ha ka 4 tarik Iaiong 2025 hi.
Ka ong ba ha ka 4 tarik Iaiong, 2025, ki Dkhot ka HYC kiba don hapdeng 50-100 ngut kila wan rung jubor hapoh ka Administrative Block jong ka Institute, pyrta slogan bad pynbor ia ki nongtrei ba kin mih na ki Ophis jong ki.
“Ka jingwan rung jong ki ka dei kaba khlem khmih lynti, bad la pyntip ruh sha ki ba ka don ka jingpyrrkhing ban rung khlem ka jingbuh por ban iakynduh briew. Wat hapdeng ka jingpyrshah ki bor pahara ban khang ia ka jingwan rung ba khlem jingbit, ki dkhot ka HYC kila thom ia ki nongpahara bad rung jubor shapoh ka Ophis da ka jingthmu ban iakynduh ia u Director, khlem da khein snep ia ki jingbthah jong ki nongpahara” ong u Deputy Director (Admin) ha ka shithi.
“Nalor kane, kila rung jubor hapoh ka Ophis u Director, bthah ia u Director ban mih shabar ban iakynduh ia ki shabar ka Building, khang tala ia ka jingkhang jong ka Administrative Block bad pyrshang ruh ban khang tala ia ka jingkhang jong ka building. Kila leit rung sha kylleng ki bynta jong ka Ophis bad dawa ia ki nongtrei ba kin mih na ki Ophis jong ki” ula bynrap.
Une u Deputy Director ula pyntip ruh ba la dep ban ujor ia ka ejahar pyrshah ia ka HYC halor kane ka jingjia bad u Chief Security Officer lyngba ka shithi ba 8 tarik Iaiong 2025, ula pyntip ba kane kam dei ka jingjia ba shu jia ryngkhat hynrei kila don ki jingwan pynthut ba kum kane da kane hi ka seng bad kiwei kiwei hashuwa kane ka jingjia.
“Nalor kane, kum kine ki jingjia kila jia ruh ha kiwei ki Institution ka Sorkar Pdeng kiba don hapoh ka Jylla, kaba pyni ia ka jingsngewkhia halor ki jingma kiba ap ia ki nongtrei” ong u Pawan.
Nalor kane, u Deputy Director ula pynpaw ruh ba bun na ki Institute ki buh ia ki bor pahara kiba shu ai contract na ki Agency ba shabar, ki bym don tiar ialeh bad ki bym pat biang ha ka jinghikai pynthit ban tehlakam ia kum kine ki jingjia. “Kane ka buh haka jingma kaba khraw ia ka jingshngain ka Institute, ki nongtrei, ki Ophisar bad ki nongleit nongwan” ula pynpaw.
Haba phone, u Director ka NEIGRIHMS Dr N Mehta ula ong “Ngan sa pynthikna ia kane lashai ka step ban tip la kila phah ne em ia kane ka shithi”.
 kala pan ia ka bor pahara da ka Central Armed Police Force (CAPF) na Delhi hadien ka jingwan thombor ba dang shen jong ka seng Hynniewtrep Youth Council (HYC) halor ka jingdawa ban pyntreikam ia ka bhah 80:20 ha ka jingthungkam nos ia ki kynthei bad ki shynrang hapoh ka Institute.){kind=link}