Shillong, K’lyngkot 30 : Ki Nongialam ka BJP-Meghalaya ha ka sngi Balang, kala iakynduh ia u Myntri kam Iada Ri Rajnath Singh ha Nongbah Delhi bad pan ia ki jaka shipai kiba don ha ka nongbah Shillong khnang ban lah pynduna ia ka jingdheng kali.
Kane ka kynhun ka dei kaba ialam da u MLA ka BJP Bah Sanbor Shullai, u President ka BJP Meghalaya Rikman G. Momin, u Vice President ka BJP Meghalaya Bernard Marak bad kiwei kiwei.
Kane ka kynhun kala iatai sani bad u Myntri halor ka jingdonkam ia ki jaka jong ki shipai kiba hap hapoh ka jingkhmih jong ka Defence Ministry kiba don ha nongbah Shillong, kaban long ka jingiarap ha kaban pynduna ia ka jingdheng kali.
Kila pynpaw ba ki jaka kiba kynthup ia ka Lady Keane Road ban mih sha Police Bazar, ka Shillong Peak Road, ka Umpling Bridge Road ban mih sha Chief Engineer Office, Shillong bad ka Footpath hajan ka Anjali Cinema Hall.
U Bah Sanbor Shullai ula ong, ba lada ai ia kitei ki surok ban pyndonkam ha kaban pyniaid ki kali jong ki paidbah ha ryngkat ka jingdon ia u pud u sam uba biang bad uba la ker, kan iarap shibun ha kaban pynduna iaka jingdheng kali.
U Bah Sanbor ula ong ruh ba katto katne ki jaka jong ka tnad Defence kaba don hajan Umsohsun ban mih sha lad Rhino lah ban pyndonkam ha kaban tei ia ka jaka pynieng kali bad kane kan pynduna ia ka jingdheng kali hajan ka Khyndailad.
U MLA ka BJP ula ong ruh ba ka jaka hajan ka Anjali Cantonment Beat House ka dei k aba lah ban pyndonkam na kabynta ban pynieng ia ki kali bad ka jaka die na ka bynta ki nongdie madan. Lah ban siew ruh ia katei ka bai jaka da kaba iaid katkum ka Land Compensation Rules jong ka Defence Ministry.
U Bah Sanbor ula iathuh ba na ka liang u Myntri ka tnad Defence ula pynthikna ba yn sa khmih bniah bha halor kane ka kam bad naka liang ka seng BJP ruh kan iai bteng ban budduen haduh ba kan da urlong.
Kane ka kynhun jong ka BJP kala pynsngew ruh ha u Myntri ka Sorkar Pdeng halor ka jingker sainar ia ka jaka hajan ka Rhino Point da ki bor shipai bad u Myntri ula kular ban shimkhia ban khmih bniah ia kane bad ula bthah ban aiti ia ki jingthoh kiba bniah ha kaba iadei bad ka jingeh kaba mad da ki riewpaidbah.
Ka kynhun ka BJP kala pyntip ba shen kan leit ban iakynduh ia u Myntri Rangbah ka jylla ban kyrpad ban thaw ia ka State Level Committee kaban khmih na ka bynta ban ioh ia ki jaka shipai kiba don ha ka nongbah Shillong.
