Shillong, Jymmang 02: Ka KSU-EJHDU ha ka sngi Balang, kala pan iaka jubab na u Deputy Commissioner ka East Jaintia Hills halor ka jingdawa jong ka seng ban pynkynriah noh ia ki BSF na ka shnong Sonapyrdi.
Ka KSU kala iakynduh markhmat ia u Deputy Commissioner ban pan ia ka jubab hadien ba ula khot iakren ia ki BSF ha ka 30 tarik Iaiong halor kane ka jingdawa kaba la mih ruh na baroh ki nongshongshnong ka thain.
Lah ban kdew ba ka KSU lem bad ka shnong Sonapyrdi bad ki nongshongshnong ka thain Huroi, Hingaria, Lejri, Myrli bad kiwei kiwei, kila iamih paidbah dang shen ban pynpaw ia ka jingpyrshah kaba jur halor ka jingbuh ktem ki BSF ha Sonapyrdi.
Ki Nongialam ka KSU ki iathuh ba u DC ula pyntip ba katei ka jingiakren kala long kaba seisoh bad ha kine ki sngi un sa pynmih ia ka hukum ban pynkynriah noh mardor ia ki BSF.
Ka seng ka maham ban iamih paidbah biang lada jia ba ki BSF kim treh ban kynriah bad lada ki dang bteng ban leh baheh bad ban ktah kti ia u paidbah.
Ka KSU kala pynkynmaw ba kala iaid lynti mynta la 6 snem ban dawa weng ia ki BSF kaba la pynlong ia ka shnat treikam ka KSU Sonapyrdi Unit, ka KSU Narpuh Circle tad haduh ba hap ban mih paidbah hapoh ka jingialam ka KSU EJHDU.
Ka KSU kala pyntip ruh ba ha ka 18 tarik u Nailur 2023 kala leit ban pynsgew sha u Symbud Myntri Rangbah ka jylla Bah Prestone Tynsong hynrei ka seng kam shym la ioh ia kano kano ka jubab na ka sorkar halor kane ka jingdawa.
Ka KSU ka pynpaw ruh ia ka jingsngewnguh ia ka bor District kaba la shimkhia ban khot iakren bad ki BSF bad kyrmen kan long kaba seisoh haduh ba kut khlem da mih kano kano ka jingthud bad ka seng kan iai buddien halor kane ka mat ha ki sngi ban wan.
