Shillong, Nailar 05 : Ka Iingkashari Meghalaya High Court kala bthah ia ka Shillong Municipal Board (SMB) ba kan aiti ia ka jubab ba thikna halor ka jingkynnoh ba katto katne ngut ki nongshong dukan madan kim pat ioh satia ia ki Certificate of Vending (CoV).
Ka Division Bench ba kynthup ia u Chief Justice IP Mukerji bad Justice W Diengdoh, kila pynmih ia kane ka hukum hadien ba shong bishar ia ka Public Interest Litigation (PIL) ba iadei bad ka jingkyndang bad pynkynriah ia ki nongshong dukan madan na ka thain Khyndailad, Shillong.
Ka kaiphod ba dang shen bala aiti da u Special Officer bad senior advactae Subhasis Chakrawarty kala pynpaw ba ka jingpynkynriah ia ki dukan madan kala iaid suk bad ka long kaba jop.
Une u Special Officer bala thung da ka Iingkashari, ula pyntip ba ka jingkyndang bad jingpynkynriah ia ki nongshong dukan madan bym don licence na ka thain Khyndailad ruh la pyndep hapdeng ka jingjai jai.
Ka Shillong Roadside Hawkers’ Association kala kynnoh ba katto katne ki nongshongdukan madan kiba dei hok ban ioh ia ka CoV, kim pat ioh satia haduh mynta, kaba pynbor ia u Special Officer ban thoh sha u Chief Executive Officer (CEO) ka SMB ba un ai jubab.
Ka Iingkashari kala bthah ia ka SMB ba kan ai ia ka jubab da ka affidavit, ka ban sa sam sha baroh ki liang mamla jong ka mukutduma.
“Ai ba ia ka copy jong ka kaiphod u Special Officer yn sam sha baroh ki nongiasaid ain lashai ka sngi ka 6 tarik Nailar. Ai ba ki copy jong ka kaiphod halor ka jubab ka SMB ban file hapoh ka 11 tarik Nailar, yn sam sha baroh ki liang mamla” ong ka hukum.
Ia kane ka PIL la buh ban shong bishar biang ha ka 13 tarik Nailar 2025.
 ba kan aiti ia ka jubab ba thikna halor ka jingkynnoh ba katto katne ngut ki nongshong dukan madan kim pat ioh satia ia ki Certificate of Vending (CoV).){kind=link}